ملتان: دریائے چناب اور دریائےستلج نے تحصیل جلال پور پیر والہ میں تباہی مچا دی،سیلاب سے سیکڑوں بستیاں متاثر ہوئی پانی شہر میں داخل ہونےکا خدشہ ، شہر خالی کرانے کے لیے مساجد سے اعلانات کیےگئے۔ مکمل انخلاتک آپریشن جاری رہے گا، وزیراعلی پنجاب مریم نواز شریف کا اعلان
وزیراعلی پنجاب مریم نواز نے سماجی رابطے کی ویب سائٹ پر ایکس پر اپنے پیغام میں کہا کہ جلالپور پیر والا میں پی ڈی ایم اے، ریسکیو اور ضلعی انتظامیہ موقع پر موجود ہیں، تقریباً 2 ہزار افراد کو محفوظ مقام پر منتقل کردیا گیا ہے۔
انہوں نے کہاکہ جلالپور پیروالا، ملتان میں ریسکیو آپریشن مکمل انخلا تک جاری رہے گا، آپریشنز کو تھرمل امیجنگ ڈرونز کے ذریعے باریک بینی سے مانیٹر کیا جا رہا ہے۔
بھارت کی جانب سے اونچے درجے کے سیلاب کی ایک اور وارننگ،دریائے ستلج میں پانی کی سطح خطرناک حد تک بلند ہوگئی۔دریائے ستلج ہرکے اور فیروزپور میں اونچے درجے کے سیلاب کاخدشہ ہے، بھارت کی جانب سے پانی چھوڑا گیا ہے ، جس کے باعث دریا میں اونچے درجے کا سیلاب متوقع ہے،وزارت آبی وسائل نے فوری طور پر سیلاب الرٹ جاری کر دیا ہے۔متعلقہ اداروں کو ہائی الرٹ پر رہنے کی ہدایت کی گئی ہے۔ذرائع ابلاغ کے مطابق ستلج اور فیروزپور کے مقام پر اونچے درجے کے سیلاب کا خدشہ ہے۔
رپورٹ کے مطابق ملتان کی تحصیل جلال پور پیروالا میں رات بھر جاری رہنے والا آپریشن اب بھی جاری ہے جبکہ انتظامیہ،ریسکیو ٹیمیں، پولیس، سول ڈیفنس اور دیگر ادارے سرگرم عمل ہیں۔
ضلعی انتظامیہ کے مطابق دریائے چناب اور دریائےستلج نے تحصیل جلال پور پیر والہ میں تباہی مچا دی، سیلاب سے سیکڑوں بستیاں متاثر ہوئی ہیں ۔
ضلع انتظامیہ کا کہنا ہے کہ اگلے 24گھنٹے میں دریائے چناب کا سیلاب دوبارہ ملتان کا رخ کرےگا، ہیڈ محمد والہ پر اسوقت پانی معمول کےمطابق ہے،حفاظتی بندوں پر پانی کے دباؤ میں کمی واقع ہوئی ہے، بندوں کےاطراف متعدد بستیوں میں پانی موجود ہے ۔
متاثرہ بستیوں سے لوگوں کو محفوظ مقامات پر منتقل کردیاگیا ہے، دوسرے ریلے کے پیش نظر حفاظتی بندوں کی کڑی نگرانی جاری ہے۔
کمشنر عامر کریم خان کا کہنا ہے کہ سیلاب سےمتاثرہ تمام افراد کے انخلا کے لیے ریسکیو آپریشن جاری رہےگا، وزیراعلیٰ پنجاب مریم نوازبراہِ راست آن لائن مانیٹرنگ کررہی ہیں، شہریوں کو محفوظ مقامات پر منتقل کیا جا رہا ہے، مشکل وقت ہے، سب ادارے مل کر کام کر رہے ہیں، ریسکیو آپریشن آخری متاثرہ شخص کے بچانے تک جاری رہے گا۔
پروونشل ڈیزاسٹر مینجمنٹ اتھارٹی (پی ڈی ایم اے) پنجاب کے ڈائریکٹر جنرل عرفان علی کاٹھیا کا کہن ہے کہ کہ ملتان کی تحصیل جلال پور پیر والا میں دریا چناب کے بڑھتے دباؤ کے باعث پیر کو اوچ شریف روڈ پر وہاڑی پل کھول کر پانی کا دباؤ کم کیا گیا جس سے 51 دیہات زیر آب آئے۔ ریسکیو آپریشن جاری ہے اور متاثرہ لوگوں کو بچا لیا گیا ہے۔
ان کا کہنا تھا کہ بند نہیں توڑے گئے، حقیقت میں صرف وہاڑی پل کھولا گیا تاکہ شہر کو بچایا جا سکے جس سے بہادر پور ، صبرا ، کنہوں اور دیگر دیہات متاثر ہوئے۔
وہاڑی پل کھولنے کے بعد پانی کے دباؤ میں کمی واقع ہوئی ہے جس سے شہر کافی حد تک محفوظ ہو گیا ہے لیکن اب بھی 12 سے 24 گھنٹے انتہائی اہم ہیں۔
پی ڈی ایم اے کے مطابق، رواں مون سون سیزن کا دسواں سپیل نو ستمبر تک جاری رہے گا۔ترجمان پی ڈی ایم اے کا کہنا ہے کہ اگلے 24 گھنٹوں میں راولپنڈی، مری، گلیات، اٹک، چکوال، جہلم، گوجرانولہ، لاہور، گجرات، سیالکوٹ، نارووال، حافظ آباد، منڈی بہاوالدین، اوکاڑہ، ساہیوال، قصور، جھنگ، سرگودھا، اور میانوالی میں بارشوں کا امکان ہے۔
اس کے علاوہ ڈیرہ غازی خان، ملتان اور راجن پور میں بھی بارشوں کا امکان ہے۔