عمرکوٹ (رپورٹ بیوروچیف ڈاکٹر ایم لال واگھانی)
عوام کو ان کی دہلیز پر فوری اور شفاف انصاف کی فراہمی کے لیے صوبائی محتسب اعلیٰ سندھ محمد سھیل راجپوت کی خصوصی ہدایات پر ڈسٹرکٹ اکاؤنٹس آفس عمرکوٹ میں ایک ہنگامی اور اہم اوپن کچہری کا انعقاد کیا گیا۔ اوپن کچہری کی صدارت ریجنل ڈائریکٹر صوبائی محتسب اعلیٰ میرپورخاص، سید امداد علی شاہ نے کی، جبکہ اس موقع پر ضلعی انتظامیہ کے اعلیٰ افسران کی موجودگی نے اس کارروائی کو مزید مؤثر بنا دیا۔اوپن کچہری کے دوران ضلع بھر سے آئے ہوئے سیسیوں اور شہریوں نے سرکاری محکموں کی مبینہ غفلت، تاخیر اور دیگر مسائل سے متعلق 20 سے زائد گرما گرم اور اہم شکایات پیش کیں۔ شہریوں کی جانب سے پنشن، تنخواہوں، مالی معاملات، ریونیو اور لوکل گورنمنٹ کے امور میں تاخیر پر شدید تحفظات کا اظہار کیا گیا۔ریجنل ڈائریکٹر سید امداد علی شاہ نے شکایات کو انتہائی سنجیدگی اور ہمدردی سے سنتے ہوئے موقع پر موجود تمام محکموں کے افسران کو کھری کھری سنائیں اور سخت وارننگ دی۔ انہوں نے دوٹوک الفاظ میں واضح کیا کہ "عوامی مسائل کے حل میں کسی قسم کی غفلت، تاخیر یا غیر ضروری رکاوٹ ہرگز برداشت نہیں کی جائے گی!” انہوں نے متعلقہ حکام کو فوری احکامات جاری کیے کہ وہ شہریوں کے جائز امور کو ترجیحی بنیادوں پر حل کریں تاکہ غریب عوام کو دفاتر کے چکر کاٹنے سے نجات مل سکے۔اوپن کچہری میں موجود شہریوں نے صوبائی محتسب اعلیٰ کے اس جرات مندانہ اقدام اور موقع پر ہی احکامات جاری کرنے کے عمل پر بھرپور اطمینان کا اظہار کیا، جبکہ ریجنل ڈائریکٹر نے عزم ظاہر کیا کہ سرکاری اداروں میں شفافیت اور جوابدہی کو یقینی بنانے کے لیے ایسے چھاپہ مار انداز کی اوپن کچہریوں کا سلسلہ جاری رہے گا۔