خوشاب (راجہ نورالہی عاطف سے):
وزیر اعلیٰ پنجاب مریم نواز شریف کی اوپن ڈور پالیسی کے تحت ڈپٹی کمشنر خوشاب ڈاکٹر جہانزیب حُسین لابر نے ڈی سی آفس میں کھلی کچہری کا انعقاد کیا، جس میں شہریوں کی بڑی تعداد نے شرکت کی۔ کھلی کچہری کے دوران ڈپٹی کمشنر نے سائلین کے مسائل بغور سنے اور ان کے فوری ازالے کے لیے موقع پر ہی متعلقہ محکموں کے افسران کو احکامات جاری کیے۔اس موقع پر گفتگو کرتے ہوئے ڈپٹی کمشنر ڈاکٹر جہانزیب حُسین لابر کا کہنا تھا کہ ضلعی انتظامیہ کے دروازے ہر خاص و عام کے لیے ہمیشہ کھلے ہیں، شہری کسی بھی جھجک کے بغیر اپنے مسائل پیش کریں۔ انہوں نے اس عزم کا اعادہ کیا کہ سائلین کے مسائل کو ترجیحی بنیادوں پر حل کرنا انتظامیہ کی اولین ذمہ داری ہے۔ڈپٹی کمشنر نے اسسٹنٹ کمشنر خوشاب سمیت تمام متعلقہ محکموں کے افسران کو سخت ہدایات جاری کرتے ہوئے کہا کہ شہریوں کے مسائل کے حل میں کسی بھی قسم کی رکاوٹ یا تاخیر برداشت نہیں کی جائے گی۔ انہوں نے ہدایت کی کہ سائلین کی طرف سے دی گئی تمام درخواستوں پر فوری عملدرآمد کیا جائے اور اس کی رپورٹ پیش کی جائے۔ڈاکٹر جہانزیب حُسین لابر نے مزید وارننگ دی کہ سرکاری محکموں میں غفلت، سستی اور کوتاہی کسی صورت قابلِ برداشت نہیں ہوگی، لہٰذا تمام محکمے اپنی ڈیوٹی کو عوامی خدمت کا فریضہ سمجھ کر احسن طریقے سے انجام دیں۔