سیالکوٹ (بیورو رپورٹ: سلیم احمد اعوان شیخو)

ڈپٹی کمشنر سیالکوٹ محمد اویس مشتاق کی ہدایت پر ضلع کونسل سیالکوٹ کی حدودمیں تجاوزات کے خاتمے اور نکاسی آب کے نظام کی بہتری کے لئے کارروائیاں تیز کر دی گئی ہیں۔ اس سلسلے میں عدالت گڑھا ریلوے پھاٹک سے اگوکی روڈ تک سڑک کے دونوں اطراف تجاوزات کے خلاف گرینڈ آپریشن کیا گیا۔
آپریشن کے دوران عدالت گڑھا روڈ پر فٹ پاتھوں پر قائم تجاوزات کو ہیوی مشینری کی مدد سے ہٹا دیا گیا جس سے پیدل چلنے والوں کے لئے مختص راستوں کو کلیئر کرانے میں مدد ملی۔ اس موقع پر متعلقہ عملے نے فٹ پاتھوں کو تجاوزات سے پاک رکھنے اور شہریوں کی آمدو رفت میں آسانی پیدا کرنے کے لیے اقدامات بھی کئے۔
چیف آفیسر ضلع کونسل سیالکوٹ زبیر وٹو نے بتایا کہ ڈپٹی کمشنر محمد اویس مشتاق کی ہدایات کے مطابق ضلع کونسل کی ٹیمیں تجاوزات کے خاتمے اور شہری سہولیات کی بہتری کے لیے متحرک ہیں۔ عدالت گڑھا میں فٹ پاتھوں پر قائم تجاوزات ختم کی جا رہی ہیں جبکہ علاقے میں نالوں کی ڈی سلٹنگ بھی شروع کر دی گئی ہے تاکہ نکاسی آب کا نظام بہتر بنایا جا سکے اور بارش یا دیگر وجوہات کی بنا پر پانی جمع ہونے کے مسائل سے بچا جا سکے۔
چیف آفیسر زبیر وٹو نے پکی کوٹلی کا دورہ بھی کیا جہاں انہوں نے سیوریج کی صفائی کے جاری کام کا جائزہ لیا اور متعلقہ عملے کو صفائی کے عمل کو مؤثر اور تسلسل کے ساتھ جاری رکھنے کی ہدایت کی۔ انہوں نے موقع پر موجود عملے سے کام کی صورتحال اور درپیش مسائل کے بارے میں بھی معلومات حاصل کیں ۔انھوں نے کہا کہ ضلع کونسل کی حدود میں تجاوزات کا خاتمہ، نالوں کی صفائی اور سیوریج کے نظام کی بہتری ضلع کونسل کی ترجیحات میں شامل ہے۔ عوامی شکایات کا فوری ازالہ یقینی بنانے کے لیے متعلقہ ٹیموں کو متحرک رکھا گیا ہے اور جہاں بھی کسی قسم کی شکایت موصول ہوگی، اس پر فوری کارروائی عمل میں لائی جائے گی۔
انہوں نے واضح کیا کہ شہریوں کو صاف ستھرا ماحول اور بہتر بلدیاتی سہولیات فراہم کرنے کے لیے فیلڈ میں کارروائیاں جاری رہیں گی، اس ضمن میں غفلت یا عدم توجہی کو برداشت نہیں کیا جائے گا۔

