رپورٹ: مجاہد علی مغل (بھریا سٹی)
نوشہروفیروز کے علاقے اٹل بوہیو کے قریب گاؤں لاکو فقیر میں دو ایکڑ زمین پر رکھی دھان اور پرال کو اچانک آگ بھڑک اٹھی، جس کے نتیجے میں لاکھوں روپے مالیت کے نقصان کا خدشہ ظاہر کیا جا رہا ہے اور 60 بوریاں باسمتی چاول بھی جل کر خاکستر ہو گئیں۔ واقعے کے خلاف کلہوڑا برادری نے شدید احتجاج کیا ۔
میڈیا سے گفتگو کرتے ہوئے محمد مٹھل کلہوڑو، ارباب کلہوڑو، حاکم کلہوڑو اور شہیمر کلہوڑی نے بتایا کہ کھوکھر برادری کے ساتھ ان کا گزشتہ 17 برس سے زمین کا تنازعہ چلا آ رہا ہے، جس کے متعدد مقدمات عدالتوں میں زیرِ سماعت ہیں۔ ان کے مطابق اس معاملے کا فیصلہ وڈیرے غلام حسین کلہوڑی کے پاس بھی ہو چکا ہے اور وہاں ان کے پانچ لاکھ روپے بھی موجود ہیں، تاہم اس کے باوجود انہیں مبینہ طور پر ہراساں اور تنگ کیا جا رہا ہے۔
متاثرین نے الزام عائد کیا کہ آج دو افراد موٹر سائیکل (125) پر آئے اور ان کے ڈیرے پر رکھی پرال اور دھان کو آگ لگا کر موقع سے فرار ہو گئے۔ احتجاج کرنے والوں کے مطابق انہوں نے روڈ پر کھڑے اشاء کھوکھر اور اقبال کھوکھر ولد صدیق کھوکھر کو شک کی بنیاد پر پہچانا ہے۔
جب وہ عدالت میں پیشی سے گھر واپس پہنچے تو پرال آگ کی لپیٹ میں تھی، جس سے خواتین اور بچوں میں شدید خوف و ہراس پھیل گیا اور بچے گھر تک آگ پہنچنے کے خدشے سے چیخنے لگے۔ متاثرین کے مطابق میونسپل انتظامیہ کی فائر بریگیڈ تاحال موقع پر نہیں پہنچ سکی، جس کے باعث وہ خود بالٹیوں کی مدد سے آگ بجھانے کی جدوجہد کر رہے ہیں، تاہم آگ پر مکمل قابو نہیں پایا جا سکا۔
کلہوڑا برادری نے عدالت عالیہ اور اعلیٰ حکام سے پرزور مطالبہ کیا ہے کہ واقعے کی غیر جانبدارانہ اور شفاف تحقیقات کرائی جائیں، ملوث عناصر کے خلاف قانون کے مطابق کارروائی کی جائے اور 17 سالہ زمینی تنازعے کا مستقل حل نکال کر انہیں تحفظ اور انصاف فراہم کیا جائے۔

