پشاور: انورزیب خان
وفاقی تحقیقاتی ادارے (ایف آئی اے) نے نوشہرہ میں ایک کامیاب کارروائی کرتے ہوئے سرکاری اسٹور سے بجلی کا قیمتی سامان چوری اور غیر قانونی طور پر فروخت کرنے والے دو مرکزی مطلوب ملزمان کو گرفتار کرلیا ہے۔
ایف آئی اے حکام کے مطابق کمپوزٹ سرکل ایبٹ آباد نے نوشہرہ پولیس کی بھرپور معاونت سے یہ کارروائی کی۔ گرفتار کیے گئے ملزمان کی شناخت محمود خان اور محمد زادہ کے ناموں سے ہوئی ہے، جن کا تعلق نوشہرہ سے ہے۔
تدتیش کے دوران یہ بات سامنے آئی ہے کہ ملزمان مبینہ طور پر پیسکو (PESCO) کے عملے کی ملی بھگت سے سرکاری اسٹور کا سامان چوری کرنے اور اسے بازار میں غیر قانونی طور پر فروخت کرنے کے گھناؤنے دھندے میں ملوث تھے۔
ایف آئی اے کا کہنا ہے کہ اس کیس کے سلسلے میں سرکاری اسٹور نوشہرہ سے چوری شدہ 52 بجلی کے کھمبے اور دیگر بھاری الیکٹرک سامان پہلے ہی برآمد کیا جا چکا ہے۔ یاد رہے کہ یہ سامان رواں سال 7 اپریل کو ہزارہ موٹروے پر مانسہرہ منتقلی کے دوران ایک نجی ٹرک سے پکڑا گیا تھا۔
ترجمان ایف آئی اے کے مطابق ملزمان کے خلاف باقاعدہ مقدمہ نمبر 15/2026 تعزیرات پاکستان اور پریوینشن آف کرپشن ایکٹ کی دفعات کے تحت درج کر لیا گیا ہے۔
گرفتار ملزمان کو مزید تفتیش اور سخت قانونی کارروائی کے لیے ایف آئی اے سرکل ایبٹ آباد منتقل کر دیا گیا ہے۔ حکام کا کہنا ہے کہ اس مکروہ دھندے اور غیر قانونی سرگرمی میں مبینہ طور پر ملوث دیگر افراد کو بے نقاب کرنے کے لیے مزید تحقیقات تیزی سے جاری ہیں۔


