سکھر (رپورٹ/ عبد الرحمان راجپوت)
ڈویژنل ڈائریکٹوریٹ آف انفارمیشن سکھر کے تحت عالمی یومِ اطفال کے موقع پر سکھر میں بڑی آگاہی ریلی نکالی گئی۔ ریلی کا مرکزی پیغام ’’میرا دن، میرے حقوق، میرا مستقبل‘‘ تھا، جس کا مقصد بچوں کے بنیادی حقوق کے تحفظ، معیاری تعلیم، بہتر صحت اور ان کے روشن مستقبل کے لیے معاشرتی شعور بیدار کرنا تھا۔ریلی کا آغاز میونسپل اسٹیڈیم سے ہوا اور یہ پریس کلب سکھر پر اختتام پذیر ہوئی۔ ریلی کی قیادت ایڈیشنل ڈپٹی کمشنر ماجد علی ماکو اور ڈپٹی میئر سکھر ڈاکٹر ارشد مغل نے کی۔ اس موقع پر مختلف سرکاری محکموں کے افسران، سماجی حلقوں کے نمائندگان، اساتذہ اور طلبہ نے بڑی تعداد میں شرکت کی۔ریلی کے شرکاء نے بینرز اور پلے کارڈز کے اٹھا رکھے تھے جن پر درج تھا کہ ہر بچے کو محفوظ، صحت مند، تعلیم یافتہ اور خوشحال زندگی گزارنے کے یکساں مواقع فراہم کرنا معاشرے کی مشترکہ ذمہ داری ہے۔ مقررین نے اس عزم کا اعادہ کیا کہ بچوں کو تشدد، استحصال، امتیازی سلوک اور دیگر سماجی مسائل سے محفوظ رکھنے کے لیے عملی اقدامات کا سلسلہ جاری رکھا جائے گا۔اس موقع پر خطاب کرتے ہوئے ایڈیشنل ڈپٹی کمشنر ماجد علی ماکو اور ڈپٹی میئر ڈاکٹر ارشد مغل نے کہا کہ:بچے کسی بھی معاشرے کا قیمتی سرمایہ اور مستقبل کے معمار ہوتے ہیں۔ ان کی بہترین تعلیم و تربیت اور حفاظت حکومت، والدین اور معاشرے کی مشترکہ ذمہ داری ہے۔اقوامِ متحدہ کے ادارے یونیسیف کے مطابق اس سال بچوں کی آواز سننے، ان کے خیالات کو اہمیت دینے اور ان کے مستقبل سے متعلق فیصلوں میں ان کی شمولیت پر خصوصی توجہ دی جا رہی ہے۔عالمی یومِ اطفال کا دن ہمیں یاد دلاتا ہے کہ بچوں کا تحفظ صرف ایک دن کی ذمہ داری نہیں بلکہ سال کے 365 دنوں کا عزم ہونا چاہیے۔آخر میں اس بات پر زور دیا گیا کہ والدین، اساتذہ، سول سوسائٹی اور تمام اداروں کو مل کر ایسا معاشرہ تشکیل دینا چاہیے جہاں کوئی بچہ تعلیم سے محروم نہ رہے اور نہ ہی جبرو مشقت کا شکار ہو۔ریلی اور تقریب میں ڈائریکٹر انفارمیشن سکھر غلام عباس گوراہو، ڈی ای او غلام مرتضیٰ شاہ، ٹی او طاہر احمد قریشی، سول ڈیفنس سکھر کے ڈاکٹر سعید اعوان، رینجرز کے ڈی ایس آر عبدالوحید گجر، سوئیٹ ہوم سکھر کے ڈائریکٹر شبیر احمد میمن، ڈسٹرکٹ اسکائوٹس شبیر شیخ، چیئرمین یو سی مکی شاہ غلام مصطفیٰ گھانگھرو، رسول بخش میمن، ندیم شاہ، غلام اصغر میمن، زبیر احمد، اور امان اللہ سمیت دیگر افسران موجود تھے۔ اس موقع پر سینٹ میری ہائی اسکول اور گورنمنٹ ہائی اسکول مینارہ روڈ کے اساتذہ اور طلبہ نے خصوصی طور پر بینڈ ٹیبلو بھی پیش کیا۔

