کویت سٹی/منامہ/واشنگٹن: مشرقِ وسطیٰ اور خلیجی خطے میں کشیدگی انتہائی خطرناک مرحلے میں داخل ہو گئی ہے، جہاں امریکا کی جانب سے ایرانی جزیرے قشم پر میزائل سائٹ کو نشانہ بنائے جانے کے بعد ایران نے بدھ کی صبح کویت اور بحرین میں واقع امریکی عسکری تنصیبات پر ڈرون اور میزائل حملے کیے ہیں۔ تاہم کویت اور بحرین دونوں ممالک نے فضائی دفاعی نظام کے ذریعے حملوں کو ناکام بنانے کا دعویٰ کیا ہے۔
تفصیلات کے مطابق کویتی فوج کی جانب سے حملہ آور ڈرونز اور میزائلوں کا مقابلہ کرنے کے لیے فضائی دفاعی نظام فعال کرنے کے اعلان کے تقریباً ایک گھنٹے بعد ایرانی فوج نے باضابطہ طور پر حملوں کی تصدیق کر دی۔ بدھ کی صبح جاری بیان میں ایرانی فوج نے دعویٰ کیا کہ اس کے جنگی ڈرونز نے کویت میں واقع "علی السالم ایئر بیس” پر موجود امریکی تنصیبات، فضائی دفاعی نظام اور ڈرون و میزائل لانچرز کو کامیابی سے نشانہ بنایا ہے۔ ایرانی فوج نے دوٹوک الفاظ میں کہا کہ وہ کسی دباؤ کے سامنے نہیں جھکیں گے اور کسی بھی جارحیت کا فیصلہ کن اور سخت جواب دیا جائے گا۔
دوسری جانب بحرین کے دارالحکومت منامہ اور دیگر علاقوں میں بھی بدھ کی صبح فضائی حملوں کے سائرن بج اٹھے اور متعدد زوردار دھماکوں کی آوازیں سنی گئیں، جس پر بحرینی وزارتِ داخلہ نے شہریوں کو موبائل فون الرٹس کے ذریعے فوری طور پر محفوظ مقامات پر منتقل ہونے کی ہدایت جاری کی۔
ایرانی پاسدارانِ انقلاب نے بیان جاری کرتے ہوئے کہا کہ اس نے ایرانی فضائی حدود کی مبینہ خلاف ورزیوں کے جواب میں بحرین کے "شیخ عیسیٰ ایئر بیس” پر موجود امریکی افواج کے ریڈار نظام کو ڈرون حملے میں ہدف بنایا ہے۔ تاہم بحرینی فوج نے مؤقف اختیار کیا ہے کہ اس کے فضائی دفاعی نظام نے متعدد ایرانی حملوں کو اہداف تک پہنچنے سے قبل ہی فضا میں تباہ کر دیا۔ بحرین کی وزارتِ خارجہ نے ان حملوں کی شدید مذمت کرتے ہوئے انہیں ملکی خودمختاری کی خلاف ورزی قرار دیا ہے اور اقوامِ متحدہ کی سلامتی کونسل سے کارروائی کا مطالبہ کیا ہے۔
قبل ازیں امریکا نے تصدیق کی تھی کہ امریکی جنگی طیاروں نے آبنائے ہرمز میں واقع ایرانی جزیرے قشم پر پاسدارانِ انقلاب کی ایک میزائل لانچنگ سائٹ کو نشانہ بنایا ہے۔ ایک امریکی اہلکار نے خبر رساں ادارے کو بتایا کہ یہ کارروائی امریکی اہلکاروں اور تنصیبات کو لاحق خطرات کے پیشِ نظر کی گئی۔
خلیج میں کشیدگی خطرناک مرحلے میں داخل، ایران کے کویت، بحرین میں امریکی فوجی بیس پر جوابی ڈرون حملے

