پشاور :پاکستان تحریک انصاف (پی ٹی آئی) کے سابق صوبائی وزرا تیمور سلیم جھگڑا، کامران بنگش اور عرفان سلیم کو تھری ایم پی او (مینٹیننس آف پبلک آرڈر) کے تحت گرفتار کر لیا گیا ہے۔ تینوں رہنماؤں نے پشاور ہائیکورٹ کے باہر خود کو پولیس کے حوالے کیا، جس کے بعد پولیس نے انہیں اپنی تحویل میں لے لیا۔ گرفتاری کے اس عمل کے پیش نظر عدالت عالیہ کے باہر پولیس کی بھاری نفری تعینات تھی اور سکیورٹی کے سخت انتظامات کیے گئے تھے۔ واضح رہے کہ اس سے قبل انسداد دہشتگردی عدالت پشاور نے 9 مئی کے ریڈیو پاکستان حملہ کیس میں نامزد ان تینوں رہنماؤں کی عبوری ضمانت کی درخواستیں خارج کر دی تھیں، جس کے بعد پولیس انہیں حتحویل میں لینے کی کوشش کی تھی تاہم وکلا کی مداخلت کے باعث اس وقت گرفتاری عمل میں نہیں آ سکی تھی۔


