کوئٹہ :بلوچستان کے مختلف علاقوں میں سکیورٹی فورسز کے دہشت گردوں کے خلاف انٹیلی جنس بیسڈ آپریشنز کے دوران بھارتی حمایت یافتہ فتنہ الہندوستان کے 8 دہشت گرد ہلاک کر دیے گئے، جن میں ایک خودکش بمبار بھی شامل ہے جب کہ دہشت گردوں کے حملے میں پاک فوج کے 2 جوان بھی شہید ہوگئے ہیں۔
إِنَّا ِلِلَّٰهِ وَإِنَّا إِلَيْهِ رَاجِعُون
Major Omer Minhas Nasir, resident of District Chakwal, and Havildar Muhammad Adnan Khan, resident of Kotli Sattian, embraced shahadat, in Balochistan, Pakistan
This cowardly act will not shaken the resolve of our Security Forces. The tempo of operations will be maintained and IBOs will continue with the same vigour to secure the local population and eliminate the menace of terrorism. Clearance operations in these areas will continue until the threat is completely neutralised.
— Pakistan Armed Forces News 🇵🇰 (@PakistanFauj) November 14, 2026
پاک فوج کے شعبہ تعلقات عامہ (آئی ایس پی آر) کے مطابق 13 نومبر سے بلوچستان کے مختلف علاقوں کوئٹہ، کولپور، قردگاپ اور نوشکی میں سیکیورٹی فورسز کے دہشت گردوں کے خلاف انٹیلی جنس بیسڈ آپریشنز جاری ہیں۔ کوئٹہ تفتان قومی شاہراہ این 40 کو مقامی ٹریفک کے لیے محفوظ بنانے کی غرض سے سیکیورٹی فورسز کی پٹرولنگ اور علاقے میں تسلط قائم رکھنے کی کارروائیاں بھی جاری ہیں۔آئی ایس پی آر کے مطابق کولپور میں رات گئے سیکیورٹی فورسز نے کامیاب کارروائی کرتے ہوئے بھارتی سرپرستی میں سرگرم فتنہ الہندوستان کے 8 دہشت گردوں کو ہلاک کردیا، جن میں ایک خودکش حملہ آور بھی شامل تھا جب کہ کارروائی کے دوران دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔
آئی ایس پی آر نے بتایا کہ 14 نومبر کو فتنہ الہندوستان کے دہشت گردوں نے مسلح کواڈ کاپٹرز کے ذریعے گشت پر مامور فوجی گاڑیوں کو نشانہ بنایا تاہم حملے میں پاک فوج کے میجر عمر منہاس ناصر اور حوالدار محمد عدنان خان نے جامِ شہادت نوش کیا۔
آئی ایس پی آر کے مطابق شہید میجر عمر منہاس ناصر کا تعلق ضلع چکوال جب کہ حوالدار محمد عدنان خان کا تعلق کوٹلی ستیاں سے تھا۔
ترجمان پاک فوج کا کہنا ہے کہ دہشت گرد حملے سیکیورٹی فورسز کے عزم کو متزلزل نہیں کرسکتے، دہشت گردی کے خطرے کے مکمل خاتمے تک متاثرہ علاقوں میں کلیئرنس آپریشنز جاری رکھے جائیں گے۔
پاک فوج کا مزید کہنا ہے کہ دہشت گردوں کو بھارت اور دیگر دشمن انٹیلی جنس ایجنسیوں کی پشت پناہی حاصل ہے، دہشت گرد ڈرونز، بارودی مواد اور جدید ٹیکنالوجی کے ذریعے کارروائیوں میں ملوث ہیں جب کہ بھارت انہیں مسلسل مالی معاونت اور جدید آلات فراہم کررہا ہے۔
آئی ایس پی آر کے مطابق سیکیورٹی فورسز دہشت گردوں کی بدلتی حکمت عملی سے پوری طرح آگاہ ہیں اور انہیں کسی صورت کارروائی کی آزادی نہیں دی جائے گی، قومی ایکشن پلان پر وفاقی ایپکس کمیٹی کے منظور کردہ وژن عزم استحکام کے تحت دہشت گردی کے خلاف کارروائیاں پوری رفتار سے جاری رہیں گی۔
ترجمان پاک فوج نے کہا کہ سیکیورٹی فورسز اور قانون نافذ کرنے والے ادارے ملک سے غیر ملکی سرپرستی میں ہونے والی دہشت گردی کے خاتمے کے لیے پرعزم ہیں۔ شہداء کی قربانیاں دہشت گردی کے مکمل خاتمے کے قومی عزم کو مزید مضبوط کرتی ہیں۔