مٹیاری (عامر علی انڑ): مٹیاری کی تحصیل ہالا لنک روڈ پر تین سال قبل قتل ہونے والے امیر بخش خاصخیلی کی بیوہ انصاف کے لیے صحافیوں کے سامنے پیش ہو گئی ہیں۔ بیوہ خاتون نے پولیس اور مخالفین پر سنگین الزامات عائد کرتے ہوئے اعلیٰ حکام سے تحفظ اور فوری انصاف فراہم کرنے کی اپیل کی ہے۔
مقامی صحافیوں کے سامنے پریس کانفرنس کرتے ہوئے متاثرہ خاتون کا کہنا تھا کہ وہ ہالا آئی ہوئی تھی اور واپسی کے وقت جاوید نامی شخص اور ایک نامعلوم نقاب پوش نے اسے مبینہ طور پر ہراساں کیا۔ اس نے بتایا کہ جاوید اس کے دیور کا بیٹا ہے اور شوہر کے قتل سے ایک ماہ قبل بھی اسے دھمکیاں دی گئی تھیں، جن کے تمام شواہد اس کے پاس موجود ہیں۔
متاثرہ خاتون کے مطابق اس کے شوہر کو جائیداد اور زمین کی فروخت کے تنازع پر اس کی آنکھوں کے سامنے قتل کیا گیا، لیکن المیہ یہ ہے کہ آج تک اس واقعے سے متعلق اس کا اپنا بیان تک ریکارڈ نہیں کیا گیا۔ اس نے الزام عائد کیا کہ پولیس نے صرف مخالف فریق کا مؤقف سنا، جبکہ اسے الٹا حراست میں رکھ کر ناانصافی کا نشانہ بنایا گیا۔
بیوہ کا مزید کہنا تھا کہ نورجہاں خاصخیلی اور زیب النساء رانی کے ساتھ ان کا جائیداد کا تنازع طویل عرصے سے چل رہا ہے۔ گزشتہ 18 سال سے اسے اور اس کے شوہر کو مسلسل دھمکیاں دی جاتی رہیں، یہاں تک کہ اس کا شوہر قتل کر دیا گیا اور اب اسے بھی جھوٹے مقدمات اور قانونی ہتھکنڈوں کے ذریعے پریشان کیا جا رہا ہے۔
متاثرہ نے شکایت کی کہ مخالفین نے ان کے گھر کا تمام سامان، کپڑے، برتن، دیگر گھریلو اشیاء اور مویشی بھی اٹھا لیے ہیں، جبکہ اس کے برعکس اس کے خلاف بھی جھوٹی ایف آئی آر درج کرا دی گئی ہے۔ اس وقت معاملہ عدالت میں زیرِ سماعت ہے، لیکن اس کے باوجود مخالف فریق کی جانب سے خوفزدہ کرنے کا سلسلہ جاری ہے۔
خاتون نے انکشاف کیا کہ مخالفین نے ان کے بزرگ والد پر بھی زمین پر جا کر تشدد کیا ہے، جس کی وجہ سے ان کی جان کو شدید خطرہ لاحق ہے۔ انہوں نے بتایا کہ عدالت سے رجوع کرنے کے باوجود ہراسانی بند نہیں ہوئی، اور انہیں ہر پیشی پر کراچی سے ہالا آنا پڑتا ہے جس کے باعث ان کے معصوم بچوں کی تعلیم بھی شدید متاثر ہو رہی ہے۔
متاثرہ بیوہ نے آئی جی سندھ اور دیگر اعلیٰ حکام سے مطالبہ کیا ہے کہ مخالف فریق کی جانب سے مختلف تھانوں میں درج کرائی جانے والی بے بنیاد ایف آئی آرز کا نوٹس لیا جائے اور اسے اور اس کے خاندان کو مکمل تحفظ فراہم کرتے ہوئے شوہر کے قاتلوں کو کیفرِ کردار تک پہنچایا جائے۔