میڈرڈ:(بے نقاب نیوزرپورٹ)
اسپین میں کرایوں میں ہوشربا اضافے، مہنگائی اور رہائشی بحران کے خلاف ملک کی تاریخ کی پہلی 24 گھنٹے طویل عام ہڑتال کے دوران ملک بھر میں حالات شدید کشیدہ ہو گئے ہیں۔ اس احتجاج میں تقریباً 40 لاکھ ملازمین (جو ملک کی کل افرادی قوت کا پانچواں حصہ ہیں) نے بھرپور شرکت کی، جس سے زندگی کے معمولات شدید متاثر ہوئے۔حالیہ برسوں میں جائیدادوں کی قیمتوں اور کرایوں میں بے پناہ اضافے کے خلاف عوام سراپا احتجاج ہیں۔ یہ تحریک ملک میں بڑھتی ہوئی بے دخلیوں اور سیاحتی کرایوں (Tourist Rentals) کے رجحان کے خلاف شروع کی گئی ہے۔ احتجاج کا سب سے زیادہ اثر کاتالونیا کے دارالحکومت بارسلونا اور دیگر ساحلی علاقوں میں دیکھا گیا۔ مظاہرین نے سڑکوں پر رکاوٹیں کھڑی کیں اور پبلک ٹرانسپورٹ کو معطل کر دیا۔ شام کے وقت صورتحال اس وقت کشیدہ ہوئی جب بعض مقامات پر نذر آتش کرنے، توڑ پھوڑ اور دکانوں کو نقصان پہنچانے کے پُرتشدد واقعات پیش آئے، جس کے بعد پولیس کے ساتھ مظاہرین کی جھڑپیں بھی ہوئیں۔قانون نافذ کرنے والے اداروں نے بدامنی پھیلانے، پبلک پراپرٹی کو نقصان پہنچانے اور پولیس پر حملے کرنے کے الزام میں ملک بھر سے کم از کم 73 افراد کو حراست میں لے لیا ہے۔ ہڑتال کے باعث ملک بھر کی فیکٹریاں، کارخانے، تعلیمی ادارے اور کاروباری مراکز یا تو بند رہے یا وہاں انتہائی محدود پیمانے پر کام جاری رہا۔مظاہرین کا مطالبہ ہے کہ حکومت بڑھتے ہوئے کرایوں پر قابو پانے اور عوام کے لیے رہائش کی فراہمی کو یقینی بنانے کے لیے فوری طور پر سخت قوانین نافذ کرے۔