میڈرڈ / اوویڈو: اسپین کے شہر اوویڈو میں فائرنگ کے ایک واقعے پر کارروائی کے دوران بم دھماکے کے نتیجے میں پولیس کا ایک اہلکار ہلاک جبکہ بم ڈسپوزل اسکواڈ کا ایک افسر شدید زخمی ہو گیا جس کی ایک ٹانگ کاٹنا پڑی ہے۔
مقامی حکام اور پولیس ذرائع کے مطابق یہ واقعہ اس وقت پیش آیا جب پولیس کو ایک عمارت میں فائرنگ اور فیملی تنازع کی اطلاع ملی، جہاں ایک 17 سالہ لڑکی گولی لگنے سے زخمی ہو گئی تھی۔
موقع پر پہنچنے والی پولیس ٹیم کو عمارت کے داخلے کے قریب ایک مشکوک بیگ نظر آیا جس میں فلشنگ لائٹ دکھائی دے رہی تھی۔ جیسے ہی کے 9 یونٹ اور بم ڈسپوزل اسکواد نے رہائشیوں کی حفاظت کے لیے بیگ کو منتقل کرنا شروع کیا، اس میں موجود دھماکہ خیز مواد اچانک پھٹ گیا۔
دھماکے میں کے-9 یونٹ کا جرمن شیفرڈ کتا اور اسکا ہینڈلر موقع پر ہی ہلاک ہو گیا، جبکہ بم ناکارہ بنانے والا ایکسپرٹ افسر شدید زخمی ہوا جس کی سرجری کے دوران ایک ٹانگ ضائع ہو گئی۔
اسپینش حکام کے مطابق حملہ آور فائرنگ کے بعد ایک لگژری گاڑی میں فرار ہو گیا، جس کی تلاش کے لیے بڑے پیمانے پر سرچ آپریشن جاری ہے۔ پولیس تاحال واقعے کی نوعیت، ممکنہ ملزم کے عزائم اور فائرنگ کا بم سے تعلق معلوم کرنے کے لیے تمام زاویوں سے تحقیقات کر رہی ہے۔