لاہور: قائم مقام گورنر پنجاب ملک محمد احمد خان نے شاعرِ مشرق، حکیم الامت علامہ محمد اقبال کے مزار پر حاضری دی۔ اس موقع پر انہوں نے مزارِ اقبال پر پھولوں کی چادر چڑھائی، فاتحہ خوانی کی اور ملک و قوم کی ترقی، خوشحالی اور استحکام کے لیے خصوصی دعائیں مانگیں۔
مزارِ اقبال پر میڈیا اور اپنے بیان میں قائم مقام گورنر پنجاب نے علامہ اقبال کو زبردست خراجِ عقیدت پیش کرتے ہوئے کہا کہ علامہ اقبال کا فلسفۂ خودی، خودداری اور قومی اتحاد آج بھی پاکستان کی بقا اور ترقی کے لیے مشعلِ راہ ہے۔ ان کا کہنا تھا کہ شاعرِ مشرق کی فکر اور شاعری ہمیں درپیش موجودہ سیاسی، معاشی اور سماجی چیلنجز سے مؤثر انداز میں نمٹنے کی کامل رہنمائی فراہم کرتی ہے۔
ملک محمد احمد خان نے ملک کی سیاسی صورتحال پر بات کرتے ہوئے زور دیا کہ تمام سیاسی دھاروں کو قومی مفاد کو اپنے سیاسی اختلافات پر ترجیح دینی چاہیے۔ انہوں نے کہا کہ اختلافِ رائے کو محاذ آرائی میں تبدیل کرنے کے بجائے جمہوری برداشت اور آئینی حدود میں رہتے ہوئے مکالمے کا ذریعہ بنانا چاہیے۔ حکومت اور اپوزیشن دونوں پر لازم ہے کہ وہ ملک و ملت کی خاطر مل بیٹھ کر سیاسی اختلافات کا حل جمہوریت کے دائرے میں نکالیں۔
انہوں نے مزید کہا کہ آئین کی بالادستی، پارلیمان کی خودمختاری اور جمہوری تسلسل ہی پاکستان کے استحکام کی ضامن ہیں۔ قائم مقام گورنر پنجاب نے بالخصوص نوجوان نسل کو مخاطب کرتے ہوئے کہا کہ وہ علامہ اقبال کی فکر و شاعری کا گہرا مطالعہ کریں اور علم، تحقیق، محنت اور خود اعتمادی کو اپنا شعار بنائیں۔ اقبال کا پیغام نوجوانوں کو بلند مقاصد کے حصول اور ملکی تعمیر و ترقی میں اپنا فعال و مؤثر کردار ادا کرنے کی ترغیب دیتا ہے