آبنائے ہرمز: سینٹکام کا کارگو جہاز پر حملہ، ایران کا دو آئل ٹینکروں کے بارودی سرنگوں سے ٹکراکر تباہ ہونے کا دعویٰ

تہران :پاسدارانِ انقلاب کی بحریہ (آئی آر جی سی نیوی) کا دعویٰ ہے کہ آبنائے ہرمز کے قریب دو آئل ٹینکر بارودی سرنگوں سے ٹکرانے کے بعد آگ کی زد میں آ گئے ہیں۔
پاسدارانِ انقلاب کے دعوے کے مطابق دو آئل ٹینکر، جن میں سے ایک آبنائے ہرمز اور دوسرا اس کے مشرقی علاقے میں موجود تھا، بارودی سرنگوں سے ٹکرانے کے بعد آگ کی زد میں آ گئے۔
بی بی سی فارسی کے مطابق یہ بیان ایرانی میڈیا میں آنے والی ان رپورٹس کے بعد سامنے آیا ہے جن میں کہا گیا تھا کہ صوبہ ہرمزگان کے مختلف علاقوں میں دھماکوں سے ملتی جلتی آوازیں سنی گئی ہیں۔
آئی آر جی سی نیوی کے مطابق دونوں ٹینکروں نے اپنے نیویگیشن اور پوزیشننگ سسٹمز بند کر رکھے تھے اور وہ ان بحری راستوں سے گزرنے کی کوشش کر رہے تھے جنھیں ایران غیر مجاز قرار دیتا ہے۔
ایرانی فورس نے خبردار کیا ہے کہ ایسے بحری جہاز جو ایران کے مقرر کردہ ضوابط کی خلاف ورزی کرتے ہوئے غیر مجاز علاقوں میں داخل ہوں گے، بارودی سرنگوں کے خطرے سے دوچار ہو سکتے ہیں۔
بیان میں جہازوں سے یہ بھی کہا گیا ہے کہ وہ امریکی سینٹرل کمانڈ کی ہدایات پر انحصار نہ کریں۔
اس سے قبل ایرانی سرکاری نشریاتی ادارے نے اطلاع دی تھی کہ قشم، سیرک، جاسک اور بندر عباس میں دھماکوں جیسی آوازیں سنی گئی ہیں۔ ابتدائی رپورٹس میں یہ واضح نہیں کیا گیا تھا کہ ان آوازوں کی وجہ کیا تھی۔
یاد رہے کہ کچھ دیر قبل امریکی سینٹرل کمانڈ نے کہا تھا کہ اس نے بحیرۂ عمان میں ہدا نامی ایک کارگو جہاز کو مبینہ طور پر اپنی ہدایات کی خلاف ورزی پر روک دیا تھا۔
تاہم فی الحال امریکی کارروائی اور آئی آر جی سی کے اس دعوے کے درمیان کسی تعلق کی تصدیق نہیں ہوئی ہے۔امریکی سینٹرل کمانڈ (سینٹ کام) نے بحیرۂ عمان میں ایک تجارتی جہاز کو ناکارہ بنا نے کا دعویٰ کرتے ہوئے کہا ہے کہ جہاز کو نشانہ تب بنایا گیا جب اس کے عملے نے متعدد انتباہات کو نظرانداز کرتے ہوئے مبینہ طور پر ایران کے خلاف بحری ناکہ بندی کی خلاف ورزی کی کوشش کی۔
سینٹ کام کے مطابق امریکی فوجی طیارے نے کارگو جہاز ایم وی ہُدا کو نشانہ بنا کر ناکارہ بنا دیا، جہاز پر سینٹ کٹس اینڈ نیوس کا پرچم آویزاں تھا۔
امریکی فوج کا کہنا ہے کہ کارروائی سے پہلے جہاز کے عملے کو ان حصوں سے دور ہونے کی ہدایت دی گئی تھی جنھیں نشانہ بنایا جانا تھا۔
سینٹ کام کے مطابق یہ جہاز ایک ایرانی بندرگاہ پر رُکنے کے بعد خطے کے پانیوں سے نکلنے کی کوشش کر رہا تھا۔
امریکی سینٹرل کمانڈ نے کہا ہے کہ وہ ایران کی بحری ناکہ بندی پر عملدرآمد جاری رکھے گا۔متحدہ عرب امارات کے نیشنل گارڈ کا کہنا ہے کہ انھوں نے بحیرۂ عمان میں ایک کارگو جہاز میں آگ لگنے کے بعد 22 افراد کو بحفاظت نکال لیا ہے۔
خبر رساں ادارے کے مطابق نیشنل گارڈ نے اتوار کے روز بتایا ہے کہ بچائے گئے تمام افراد عرب ممالک کے شہری ہیں۔