ڈھڈیال: نمائندہ بے نقاب نیوز منور حسین
موٹروے M-2 پر بلکسر انٹرچینج کے قریب کار اور بائیس ویلر ٹرالر کے درمیان ایک خوفناک تصادم کے نتیجے میں ایک شخص جاں بحق جبکہ دو خواتین شدید زخمی ہو گئیں، تاہم کار میں سوار دو سالہ کمسن بچہ معجزانہ طور پر محفوظ رہا۔
ریسکیو 1122 ذرائع کے مطابق، محمد عقیل اپنی اہلیہ اور بچوں کے ہمراہ پشاور سے لاہور جا رہا تھا کہ بلکسر انٹرچینج کے قریب ان کی کار بے قابو ہو کر آگے جانے والے ٹرالر سے جا ٹکرائی۔ حادثہ اتنا شدید تھا کہ کار میں سوار محمد عقیل موقع پر ہی جاں بحق ہو گیا، جبکہ اس کی 29 سالہ اہلیہ حبیبہ اور 35 سالہ صنم شدید زخمی ہو گئیں۔ خوش قسمتی سے گاڑی میں موجود دو سالہ روحان ولد محمد عقیل اس ہولناک حادثے میں حیرت انگیز طور پر محفوظ رہا۔
اطلاع ملتے ہی ریسکیو 1122 کی ٹیمیں فوری طور پر جائے حادثہ پر پہنچ گئیں اور زخمی خواتین کو ابتدائی طبی امداد فراہم کرنے کے بعد ٹراما سینٹر کلر کہار منتقل کر دیا۔ دوسری جانب، ایف ڈبلیو او کی ایمبولینس کے ذریعے جاں بحق ہونے والے محمد عقیل کی میت بھی ہسپتال منتقل کر دی گئی۔
