وزیراعظم شہباز شریف سے چینی کمیونسٹ پارٹی کے وزیر کی ملاقات، مختلف شعبوں میں تعاون بڑھانے پر اتفاق

اسلام آباد: وزیراعظم شہباز شریف سے چینی کمیونسٹ پارٹی کے بین الاقوامی محکمے کے وزیر لیو ہائی شینگ کی ملاقات ہوئی، جس میں پاک چین تزویراتی شراکت داری مزید مضبوط بنانے، تجارت، سرمایہ کاری، انفراسٹرکچر، آئی ٹی اور زراعت سمیت مختلف شعبوں میں تعاون بڑھانے پر اتفاق کیا گیا۔ دونوں رہنماؤں نے سیاسی روابط، علاقائی و عالمی امور اور باہمی تعاون کے فروغ کے عزم کا بھی اعادہ کیا۔
وزیرِ اعظم محمد شہباز شریف سے چینی کمیونسٹ پارٹی کی مرکزی کمیٹی کے بین الاقوامی محکمے (IDCPC) کے وزیر مسٹر لیو ہائی شینگ کی اسلام آباد میں ملاقات ہوئی۔
وزیراعظم نے مسٹر لیو ہائی شینگ اور ان کے وفد کا خیرمقدم کرتے ہوئے کہا کہ پاکستان اور چین کے مابین آہنی دوستی، آزمودہ اور ہر آزمائش پر پورا اترنے والی تزویراتی تعاون پر مبنی شراکت داری قائم ہے ۔ انہوں نے کہا کہ پاکستان اور چین کی دوستی باہمی اعتماد، احترام اور دونوں ممالک کے عوام کے درمیان گہرے روابط پر استوار ہے۔
وزیراعظم نے دوطرفہ تعلقات کو مزید مستحکم بنانے کے لیے مسلسل سیاسی روابط اور سیاسی جماعتوں کے درمیان تبادلوں کی اہمیت پر زور دیا۔ انہوں نے دونوں ممالک کی سیاسی قیادت کے درمیان ادارہ جاتی روابط کے فروغ اور تعاون کو آگے بڑھانے میں چینی کمیونسٹ پارٹی کی مرکزی کمیٹی کے بین الاقوامی محکمے کے اہم کردار کو سراہا۔
وزیراعظم نے چین کے ساتھ قریبی تعاون جاری رکھنے کے عزم کا اعادہ کرتے ہوئے تجارت، سرمایہ کاری، علاقائی روابط، بنیادی ڈھانچے کی ترقی، انفارمیشن ٹیکنالوجی اور زرعی شعبے میں جدت سمیت مختلف شعبوں میں تعاون کو فروغ دینے کے لیے دونوں ممالک کی مشترکہ خواہش کو سراہا۔
مسٹر لیو ہائی شینگ نے چینی قیادت کی جانب سے وزیر اعظم کو نیک تمناؤں کا پیغام پہنچایا اور پاکستان کے ساتھ دیرینہ دوستی کو مزید گہرا کرنے کے لیے چین کے عزم کا اعادہ کیا۔ انہوں نے دونوں ممالک کے درمیان اعلیٰ سطح کے روابط اور سیاسی جماعتوں کے مابین تبادلوں میں جاری پیش رفت کو پر اطمینان کا اظہار کیا، جس کا مقصد دونوں ممالک کی آہنی دوستی کو مزید مستحکم بنانا ہے۔
دونوں رہنماؤں نے علاقائی اور عالمی امور پر تبادلہ خیال کیا اور دوطرفہ و کثیرالجہتی فورمز پر قریبی رابطے اور تعاون جاری رکھنے کے عزم کا اعادہ کیا گیا۔
وزیراعظم نے معزز مہمان اور ان کے ہمراہ آنے والے چینی وفد کے اعزاز میں عشائیے کی بھی میزبانی کی۔