مٹیاری رپورٹ: عامر علی انڑ
مٹیاری کی تحصیل ہالا میں جمعیت علماءِ اسلام (جے یو آئی) تعلقہ ہالا کے رہنماؤں نے پارٹی سربراہ مولانا فضل الرحمان کے خلاف مبینہ میڈیا ٹرائل، پروپیگنڈے اور غیر قانونی نوٹسز جاری کرنے کی سخت الفاظ میں مذمت کرتے ہوئے کہا ہے کہ ایسے ہتھکنڈے کسی صورت قبول نہیں کیے جائیں گے۔
تعصیل ہالا میں ایک اہم پریس کانفرنس سے خطاب کرتے ہوئے جے یو آئی تعلقہ ہالا کے امیر حاجی صاحب ڈنو وریاہ، الہٰ ڈنو سومرو اور عبدالوحید کوریجو نے کہا کہ مولانا فضل الرحمان کے خلاف مبینہ طور پر غیر قانونی نوٹسز جاری کرکے میڈیا کے ذریعے ان کی سیاسی ساکھ کو نقصان پہنچانے کی مذموم کوشش کی جا رہی ہے۔ رہنماؤں نے اس بات پر زور دیا کہ ماضی میں بھی مولانا فضل الرحمان کو دباؤ میں لانے کے لیے مختلف حربے استعمال کیے گئے، تاہم وہ ہر دور میں اپنے سیاسی اور نظریاتی مؤقف پر چٹان کی طرح ثابت قدم رہے ہیں۔
پریس کانفرنس کے دوران قائدین نے مطالبہ کیا کہ مولانا فضل الرحمان کے خلاف جاری کیے جانے والے نوٹسز اور میڈیا پر لگائے جانے والے بے بنیاد الزامات کے معاملے میں قانونی تقاضوں اور حقائق کو مدنظر رکھتے ہوئے شفاف طریقہ کار اپنایا جائے۔ انہوں نے اس عزم کا اظہار کیا کہ کسی بھی شخصیت کی ساکھ کو متاثر کرنے سے پہلے معاملے کی مکمل، شفاف اور غیر جانبدارانہ تحقیقات کی جانی چاہئیں۔