سامارو (رپورٹ بیوروچیف ڈاکٹر ایم لال واگھانی):
سامارو شہر کے مین بس اسٹاپ چوک پر سماجی کارکن عظیم خاصخیلی کی قیادت میں منشیات کے بڑھتے ہوئے مبینہ کاروبار کے خلاف ایک پرزور احتجاجی مظاہرہ کیا گیا۔ مظاہرین نے شہر میں منشیات کی کھلے عام فروخت کی روک تھام اور اس قبیح فعل میں ملوث عناصر کے خلاف مؤثر قانونی کارروائی کا پرزور مطالبہ کیا۔
اس موقع پر احتجاجی مظاہرے کے شرکاء سے خطاب کرتے ہوئے سماجی رہنما عظیم خاصخیلی نے کہا کہ سامارو میں مبینہ طور پر منشیات کا کاروبار تیزی سے پھیل رہا ہے، جس کے منفی اثرات سے ہماری نوجوان نسل اور معصوم بچے براہِ راست متاثر ہو رہے ہیں۔ انہوں نے اس تشویشناک صورتحال پر فوری اور مؤثر پولیس کارروائی کی اشد ضرورت پر زور دیا۔
انہوں نے اعلیٰ پولیس حکام سے پرزور مطالبہ کیا کہ منشیات اور آئس کے اس مبینہ کاروبار میں ملوث تمام عناصر کے خلاف بلاامتیاز قانونی کارروائی کی جائے اور سامارو شہر کو منشیات سے مکمل طور پر پاک بنانے کے لیے ہنگامی اور عملی اقدامات اٹھائے جائیں۔
احتجاج میں ناصر پٹھان، اصلو کھوسو، عزت خاصخیلی سمیت شہریوں اور سماجی حلقوں سے تعلق رکھنے والے افراد نے بڑی تعداد میں شرکت کی اور منشیات کے خلاف بھرپور آواز بلند کی۔
مظاہرین کا عزم تھا کہ نوجوان نسل کے روشن اور محفوظ مستقبل کو بچانے کے لیے منشیات کے ناسور کا جڑ سے خاتمہ ناگزیر ہے اور اس مقصد کے لیے ترجیحی بنیادوں پر اقدامات کیے جائیں۔