خوشاب (راجہ نورالہی عاطف سے)
ٹھٹھی کالک بھن جوڑاکلاں میں روایتی لمبی کھیڈ کبڈی کے ایک شاندار اور پرجوش مقابلے کا انعقاد کیا گیا، جس میں مختلف علاقوں سے تعلق رکھنے والے کبڈی کے نامور کھلاڑیوں نے بھرپور حصہ لیا۔ مقابلے کے دوران پہلوانوں نے اپنی جسمانی قوت، پھرتی، مہارت اور بہترین کھیل کا شاندار مظاہرہ کیا، جبکہ ہزاروں شائقینِ کبڈی نے دلچسپ اور کانٹے دار مقابلوں سے بھرپور لطف اٹھایا۔ اس سنسنی خیز کبڈی مقابلے میں نمایاں کارکردگی دکھانے والے کھلاڑیوں کی تفصیل درج ذیل ہے:پہلی پوزیشن (فرسٹ ونر): اظہر عباس جھجھ (سکنہ مبھارے خان، ساہیوال)دوسری پوزیشن: مظہر دھون (نورپور تھل)تیسری پوزیشن: ملک آصف نتھوکہ (حویلی نتھوکہ) ایونٹ کے اختتام پر مہمانانِ خصوصی — سوشل ورکرز ملک محمد عمران جوڑا، ملک غلام عباس شاہین جوڑا اور ملک محمد رمضان ہیدھن — نے شاندار کارکردگی دکھانے والے کھلاڑیوں میں انعامات تقسیم کیے۔ انہوں نے کھلاڑیوں کی حوصلہ افزائی کی اور روایتی دیہی کھیلوں کے فروغ کے لیے اس طرح کے مقابلوں کے انعقاد کو انتہائی قابلِ تحسین قرار دیا۔اس شاندار کبڈی ایونٹ کو کامیاب بنانے میں منتظمین ملک عباس شیر جوڑا، زوار ملک، ظفر اقبال جوڑا اور ملک نسیم عباس جوڑا نے اہم کردار ادا کیا، جن کی دن رات محنت اور پرخلوص کاوشوں سے یہ کھیلوں کی بڑی سرگرمی بخوبی انجام پاتی رہی۔ اہلِ علاقہ اور دور دراز سے آئے ہوئے شائقینِ کبڈی نے اس شاندار مقابلے کے انعقاد کو بے حد سراہا۔ ان کا کہنا تھا کہ کبڈی ہماری شاندار پنجاب کی ثقافت اور دیہی روایات کا اہم ترین حصہ ہے۔ ایسے دیہی مقابلوں کے انعقاد سے نہ صرف نوجوان نسل میں کھیلوں کا صحت مند شوق فروغ پاتا ہے بلکہ اس سے معاشرے میں باہمی محبت، بھائی چارے، رو رواداری اور علاقائی ثقافت کو بھی تقویت ملتی ہے۔