کراچی :کراچی میں ڈرگ روڈ کینٹ بازار کے قریب ایک رہائشی گھر کے اندر فائرنگ کا دلخراش واقعہ پیش آیا ہے، جہاں گھریلو تنازع پر فائرنگ سے زخمی ہونے والی دونوں سگی بہنیں زخموں کی تاب نہ لاتے ہوئے ہسپتال میں دم توڑ گئیں۔
پولیس حکام کے مطابق جاں بحق ہونے والی دونوں خواتین کی شناخت 25 سالہ صوبیہ اور 23 سالہ حرا کے نام سے ہوئی ہے۔ ابتدائی تحقیقات کے مطابق فائرنگ کا یہ افسوسناک واقعہ گھر کے اندر پیش آیا، جہاں گھریلو تنازع کے دوران ملزم بھائی ریحان نے طیش میں آ کر اپنی دونوں بہنوں کو فائرنگ کر کے شدید زخمی کر دیا۔ واقعے کے فوری بعد دونوں خواتین کو تشویشناک حالت میں قریبی ہسپتال منتقل کیا گیا، تاہم وہ جاں بر نہ ہو سکیں۔ پولیس نے بتایا کہ فائرنگ کے بعد ملزم موقع سے فرار ہونے میں کامیاب ہو گیا ہے، جس کی گرفتاری کے لیے چھاپے مارے جا رہے ہیں اور پولیس کی ٹیمیں اس کی تلاش میں مصروف ہیں۔ مزید برآں، یہ بھی انکشاف ہوا ہے کہ مقتولہ دونوں خواتین کے والد کا محض پانچ روز قبل ہی انتقال ہوا تھا۔
