فیصل آباد: ’ایلفی’کا مالک ریحان اشرف گاڑی چوروں کے ہاتھوں ق ت ل، ویلے پارکنگ کا ڈرائیور ملوث نکلا

فیصل آباد (ویب ڈیسک): صنعتی شہر فیصل آباد میں ایک انتہائی افسوسناک اور دل دہلا دینے والا واقعہ پیش آیا ہے جہاں معروف GMSA (جمسا) کمپنی کے مالک ریحان اشرف اپنی کروڑوں روپے مالیت کی جدید "سگنس” (CYGNUS) گاڑی چوری ہونے کے بعد ملزمان کا تعاقب کرتے ہوئے فائرنگ سے جاں بحق ہو گئے۔
تھانہ صدر میں درج کروائی گئی ایف آئی آر کے مطابق ریحان اشرف رات کے وقت کھانا کھانے فیصل آباد کے مشہور چناب کلب پہنچے تھے۔ انہوں نے اپنی گاڑی معمول کے مطابق وہاں موجود ویلے پارکنگ کے عملے کے حوالے کی اور خود کلب کے اندر چلے گئے۔ ابھی انہوں نے کھانا شروع بھی نہیں کیا تھا کہ ان کے موبائل پر گاڑی کے آن اور آف ہونے کے سگنل ملنا شروع ہو گئے۔
گاڑی کے سگنلز ملتے ہی ریحان اشرف فوری طور پر پارکنگ کی طرف بھاگے، لیکن وہاں پہنچ کر پتہ چلا کہ گاڑی اور ویلے پارکنگ کا لڑکا دونوں غائب ہیں۔
ریحان اشرف نے بلاتعطل ٹریکر کمپنی کو اطلاع دی اور اپنے دوستوں کے ساتھ دوسری گاڑی میں ٹریکر کی واٹس ایپ لوکیشن کا تعاقب شروع کر دیا۔

تعاقب کے دوران جڑانوالہ روڈ کے قریب چوروں کی گاڑی شدید ٹریفک جام میں پھنس گئی۔
اپنی گاڑی کو سامنے رکا دیکھ کر ریحان اشرف گاڑی سے اتر کر چوروں کو پکڑنے کے لیے آگے بڑھے۔ اسی اثنا میں گاڑی میں موجود مسلح ملزمان نے ان پر اندھا دھند فائرنگ کر دی، جس کے نتیجے میں ریحان اشرف موقع پر ہی جاں بحق ہو گئے۔ ملزمان فائرنگ کے بعد گاڑی سمیت فرار ہونے میں کامیاب ہو گئے۔
واقعے کے بعد پولیس کی بھاری نفری موقع پر پہنچ گئی اور لاش کو تحویل میں لے کر قانونی کارروائی شروع کر دی۔ پولیس نے ریحان اشرف کے بھائی حسن اشرف کے بیان پر تھانہ صدر میں قتل، ڈکیتی اور چوری کی سنگین دفعات کے تحت مقدمہ درج کر لیا ہے۔ ابتدائی تحقیقات کے مطابق ویلے پارکنگ کا عملہ اور چوروں کا منظم گروہ اس چوری اور قتل کی واردات میں ملوث پایا گیا ہے، جس کی گرفتاری کے لیے چھاپے مارے جا رہے ہیں۔