پاکپتن(رپورٹ:اکرام حسین شاہ بے نقاب نیوز )
چیف جسٹس لاہور ہائی کورٹ جسٹس عالیہ نیلم کے دورۂ پاکپتن کے موقع پر وکلا برادری کی جانب سے ان کا شاندار اور پرتپاک استقبال کیا گیا۔ \
دورے کے دوران چیف جسٹس نے نئی جوڈیشل عمارت کا باقاعدہ افتتاح کیا، اس موقع پر ڈسٹرکٹ بار اور تحصیل بار کے تمام عہدیداران بھی موجود تھے۔افتتاحی تقریب کے بعد چیف جسٹس لاہور ہائی کورٹ نے عظیم صوفی بزرگ دربار حضرت بابا فرید الدین مسعود گنج شکرؒ پر حاضری دی،
جہاں انہوں نے چادر پوشی کی اور ملک پاکستان کی سلامتی، استحکام، امن و خوشحالی کے لیے خصوصی دعائیں مانگیں۔دورے کے دوران وکلا برادری اور عدالتی امور سے متعلق معاملات کو خصوصی اہمیت دی گئی بار کے عہدیداران نے چیف جسٹس کے سامنے عدالتی نظام میں بہتری، وکلا کو درپیش مسائل اور عام سائلین کے لیے انصاف کی فراہمی کے عمل کو مزید موثر بنانے کے حوالے سے امور پر تفصیلی تبادلۂ خیال کیا۔چیف جسٹس لاہور ہائی کورٹ کے اس دورۂ پاکپتن کو عدلیہ اور وکلا برادری کے درمیان باہمی تعاون، روابط کے فروغ اور عدالتی ڈھانچے کی بہتری کے حوالے سے انتہائی اہم قرار دیا جا رہا ہے۔
