پشاور:
خیبرپختونخوا کے سرکاری اسکولوں کی ابتر صورتحال کا ایک اور تشویشناک انکشاف سامنے آیا ہے، جہاں صوبے بھر کے اسکولوں میں تقریباً 37 ہزار (36,967) کلاس رومز خستہ حال ہونے کی وجہ سے فوری طور پر تعمیرِ نو یا مرمت کے منتظر ہیں۔محکمہ تعلیم کی رپورٹ کے مطابق ان خستہ حال اور فرسودہ عمارتوں کی وجہ سے اسکولوں میں پڑھنے والے لاکھوں طلبہ کی جانوں کو شدید خطرات لاحق ہیں۔ صورتحال کی سنگینی کو مدنظر رکھتے ہوئے حکومتِ خیبرپختونخوا نے صوبے بھر کے تمام سرکاری اسکولوں کی عمارتوں کا فوری طور پر جامع تکنیکی معائنہ کرنے کا فیصلہ کیا ہے، تاکہ کسی بھی بڑے حادثے سے بچنے کے لیے ہنگامی بنیادوں پر اقدامات کیے جا سکیں۔ماہرینِ تعلیم اور والدین نے حکومت سے مطالبہ کیا ہے کہ ان خستہ حال کلاس رومز کی مرمت اور نئے کمروں کی تعمیر کا کام فوری طور پر شروع کیا جائے تاکہ بچوں کا تعلیمی سلسلہ بھی متاثر نہ ہو اور ان کا تحفظ بھی یقینی بنایا جا سکے۔