سیالکوٹ:پسرور (ـسلیم احمد اعوان شیخو محمد اشفاق بے نقاب نیوز سے)
پسرور تھانہ سٹی کی حدود میں پیسوں کی قسط ادا کرنے کا پیغام دینے پر ایک خاتون پر مبینہ تشدد، اس کے کپڑے پھاڑنے اور سنگین نتائج کی دھمکیاں دینے کا انتہائی افسوسناک واقعہ پیش آیا ہے۔ تھانہ سٹی پولیس نے فوری کارروائی کرتے ہوئے ملزم کے خلاف مقدمہ درج کر کے اسے گرفتار کر لیا ہے۔تفصیلات کے مطابق، الکڑہ پھاٹک نزد پانی والی ٹینکی کی رہائشی عابدہ پروین زوجہ سلامت علی نے پولیس کو تحریری درخواست دی کہ انہوں نے عظیم نامی شخص کو قسطوں پر رقم دلوانے میں معاونت کی تھی اور وہ اس معاملے میں گواہ تھیں۔ واقعہ کی رات جب بینک والا قسط لینے کے لیے آیا تو مدعیہ نے عظیم کو پیغام دیا کہ "قسط والے آئے ہیں، قسط دے دو۔”یہ پیغام ملنے پر عظیم کا بیٹا علی طیش میں آگیا اور اس نے مبینہ طور پر عابدہ پروین کے ساتھ ہاتھا پائی کی، ان کے کپڑے پھاڑ دیے اور گالیاں دیتے ہوئے شدید زدوکوب کیا۔ایس ایچ او سٹی پسرور، سرمد فیاض نے مدعیہ کی درخواست پر فوری ایکشن لیتے ہوئے ملزم کے خلاف تعزیراتِ پاکستان کی دفعہ 354 (خاتون پر حملہ یا اس کی حرمت پامال کرنا) اور دفعہ 506 (سنگین دھمکیاں دینا) کے تحت مقدمہ درج کر کے قانونی کارروائی کا آغاز کر دیا ہے۔
