عمرکوٹ (بیوروچیف ڈاکٹر ایم لال واگھانی)
عمرکوٹ برائیٹ فیوچر پبلک اسکول میں نیشنل آن لائن سسٹم کے تحت نمایاں پوزیشنز حاصل کرنے والے طلبہ و طالبات کے اعزاز میں ایک پروقار تقریب کا انعقاد کیا گیا۔ تقریب کی مہمانِ خاص نامور سماجی شخصیت، اسپورٹس مین وومن اور رحمدانی کرکٹ اکیڈمی (رجسٹرڈ حکومتِ سندھ) عمرکوٹ کی صدر جمیلا کھوسہ تھیں۔تقریب میں نیشنل آن لائن امتحانات میں شاندار پوزیشنز حاصل کرنے والے طالبات اور طلبہ میں گولڈ میڈلز، برونز میڈلز، اسناد (سرٹیفیکیٹس)، کیش انعامات اور اساتذہ میں خصوصی شیلڈز تقسیم کی گئیں۔پوزیشن حاصل کرنے والے نمایاں طلبہ و طالبات میں دانی دلپ (پہلی پوزیشن)، رتی ویک، عجل محمد، زین، محمد الیان، مہاویر، مکیش کمار، مہاجبین، ناصر علی، توبہ علی، چینا دیوی، غلام مجتبیٰ اور دیگر شامل ہیں جنہیں ان کی بہترین کارکردگی پر ایوارڈز سے نوازا گیا۔اس موقع پر تقریب سے خطاب کرتے ہوئے مہمانِ خاص جمیلا کھوسہ نے پوزیشن حاصل کرنے والے بچوں، ان کے والدین اور اساتذہ کو مبارکباد دیتے ہوئے کہا کہ آن لائن نیشنل امتحانات میں پوزیشنز حاصل کرنا عمرکوٹ کے لیے ایک بہت بڑا اعزاز ہے۔ انہوں نے سندھ کے نامور ماہرِ تعلیم اور ریجنل ڈائریکٹر برائیٹ فیوچر پبلک اسکول محمد بخش کھوسہ کی خدمات کو خراجِ تحسین پیش کرتے ہوئے کہا کہ انہوں نے بڑی محنت کے ساتھ عمرکوٹ کے بچوں کو آگے بڑھایا ہے۔ انہوں نے حقیقی تبدیلی اور تعلیم کے فروغ کے لیے جدوجہد کرنے والے اساتذہ کی خدمات کو بھی سراہا جن کی بدولت عمرکوٹ کے طلبہ نے ملک بھر میں اسکول کا نام روشن کیا ہے۔ عمرکوٹ تعلیمی حوالے سے سندھ بھر میں ایک نمایاں مقام رکھتا ہے۔تقریب کے آخر میں ڈائریکٹر برائیٹ فیوچر پبلک اسکول محمد بخش کھوسہ نے تمام پوزیشن ہولڈرز کو مبارکباد پیش کی۔ اس خوشی کے موقع پر مہمانِ خاص جمیلا کھوسہ نے بچوں کے ہمراہ کیک کاٹا، ملک پاکستان کی سلامتی اور خوشحالی کے لیے خصوصی دعائیں مانگی گئیں اور شرکاء میں مٹھائیاں تقسیم کی گئیں۔