قصور (رپورٹ: محمد وقاص اشرف)
اسسٹنٹ کمشنر جڑانوالہ ضیاء اللہ گوندل نے خواتین کو ان کے جائز وراثتی حقوق کی فراہمی کے لیے بروقت اور مثالی اقدامات کرتے ہوئے چار بہنوں کو بڑا ریلیف فراہم کیا ہے۔ لنڈا بازار جڑانوالہ میں مرحوم اکرم کی وراثتی جائیداد کے تنازعے میں اے سی کی موثر مداخلت کے باعث بہنوں کو ان کے بھائی اور بھتیجے سے قانون کے مطابق وراثتی حصہ حاصل کرنے میں کامیابی ملی ہے۔ درخواست گزار نوشین اکرم کا تعلق قصور سے ہے، جبکہ ان کی دیگر بہنیں مختلف شہروں میں مقیم ہونے کے باعث بار بار جڑانوالہ کا سفر کرنے سے قاصر تھیں۔ اس مشکل کو مدنظر رکھتے ہوئے اسسٹنٹ کمشنر نے معاملے میں فوری دلچسپی لی تاکہ خواتین کو غیر ضروری دفتری چکروں اور ذہنی اذیت سے بچایا جا سکے۔خواتین کے تحفظ کو یقینی بنانے اور قانون پر عملدرآمد کروانے کے لیے اے سی جڑانوالہ نے ایس پی جڑانوالہ کو باضابطہ خط ارسال کیا، جبکہ وراثتی حقوق کے مطابق جائیداد کا قانونی قبضہ دلوانے کے لیے موقع پر پیرا فورس بھی فراہم کی گئی، جس سے متاثرہ خواتین کو ان کا حق بحفاظت مل گیا۔اس موقع پر گفتگو کرتے ہوئے اسسٹنٹ کمشنر ضیاء اللہ گوندل نے کہا کہ ڈپٹی کمشنر فیصل آباد محمد نعمان صدیق کی واضح ہدایات کے مطابق خواتین اور بزرگ شہریوں کو ترجیحی بنیادوں پر ریلیف فراہم کرنا ضلعی انتظامیہ کی اولین ذمہ داری ہے۔ بابا بلھے شاہ کی دھرتی قصور کے عوام انتہائی قابلِ احترام ہیں اور عوام کے مسائل کا فوری حل ان کے لیے باعثِ اطمینان ہے۔