ٹنڈوالہیار (رپورٹ: تیمور رضا قائم خانی)
ٹنڈوالہیار میں مہنگائی کا جن بے قابو ہو گیا ہے، جہاں بنیادی خوراک یعنی آٹا بھی غریب عوام کی پہنچ سے دور ہوتا جا رہا ہے۔ شہر اور گردونواح میں چکی مافیا نے صرف دو دن کے اندر آٹے کی قیمتوں میں من مانا اور ظالمانہ اضافہ کر دیا ہے۔ذرائع کے مطابق دو روز قبل جو آٹا 140 روپے فی کلو فروخت ہو رہا تھا، اب وہ چکیوں پر 160 روپے فی کلو اور کریانہ اسٹوروں پر 165 روپے فی کلو تک فروخت کیا جا رہا ہے۔ قیمتوں میں اس اچانک اور ہوشربا اضافے سے غریب اور متوسط طبقے میں شدید تشویش کی لہر دوڑ گئی ہے۔شہریوں کا کہنا ہے کہ پہلے ہی مہنگائی نے ان کی کمر توڑ رکھی ہے، اور اب روٹی کا حصول بھی انتہائی مشکل بنا دیا گیا ہے۔ دوسری جانب ضلعی انتظامیہ اور ڈپٹی کمشنر ٹنڈوالہیار کی خاموشی پر شہریوں نے شدید حیرت اور غم و غصے کا اظہار کیا ہے۔عوام نے پرزور مطالبہ کیا ہے کہ ڈپٹی کمشنر اور اسسٹنٹ کمشنر ٹنڈوالہیار فوری طور پر اس صورتحال کا نوٹس لیں، چکی مافیا کے خلاف سخت کارروائی کریں اور شہر میں آٹے کی سرکاری نرخ پر فروخت کو ہر صورت یقینی بنائیں۔