سکھر (رپورٹ: عبد الرحمان راجپوت)
پاکستان مسلم لیگ فنکشنل سندھ کے صوبائی رہنماء ایڈوکیٹ سید شفقت علی شاہ نے خیرپور ریاست کے آخری حکمران میر علی مراد خان تالپور کے انتقال پر گہرے دکھ اور افسوس کا اظہار کرتے ہوئے سوگوار خاندان، بالخصوص مرحوم کے صاحبزادے پرنس میر مہدی رضا تالپور سے دلی تعزیت کی ہے۔اپنے تعزیتی بیان میں ایڈوکیٹ سید شفقت علی شاہ نے کہا کہ میر علی مراد خان تالپور کا انتقال نہ صرف تالپور خاندان بلکہ پوری سندھ کے لیے ایک بڑا نقصان ہے۔ مرحوم خیرپور کی تاریخ، ثقافت اور شاہی ورثے کی ایک معتبر اور تاریخی پہچان تھے۔ خیرپور ریاست کی فلاح و بہبود اور تاریخ میں مرحوم کے خاندان کی خدمات کو ہمیشہ یاد رکھا جائے گا۔ انہوں نے مرحوم کی خدمات کو خراجِ عقیدت پیش کرتے ہوئے اہلِ خانہ سے ہمدردی اور یکجہتی کا اظہار کیا۔پاکستان مسلم لیگ فنکشنل کے صوبائی رہنما نے دعا کی کہ اللہ تعالیٰ میر علی مراد خان تالپور دوم کو جنت الفردوس میں اعلیٰ مقام عطا فرمائے اور تمام لواحقین کو صبرِ جمیل عطا فرمائے۔