سکھر (رپورٹ: عبدالرحمان راجپوت)
اصغریہ پاکستان ویلفیئر پروجیکٹ کے تحت ضلع سکھر میں اجتماعی شادیوں کی پروقار تقریب کا انعقاد کیا گیا۔ یہ تقریب ایس ای ایف (SEF) فاؤنڈیشن کے تعاون اور ایف ای ایم ٹی (فرینڈز ایجوکیشن اینڈ میڈیکل ٹرسٹ) کی سہولت کاری سے منعقد ہوئی، جس میں کل 17 مستحق جوڑوں کی شادیاں کرائی گئیں۔تقریب میں اصغریہ کونسل پاکستان کے چیئرمین جناب رسول بخش حسینی، اصغریہ ویلفیئر پروجیکٹ کے ڈپٹی ڈائریکٹر جنرل جناب نثار علی منتظری، حجۃ الاسلام والمسلمین علامہ غلام قمر قرائتی، مرکزی سیکریٹری نشر و اشاعت علی حسن اصغری اور اصغریہ پاکستان ضلع سکھر کے صدر عاشق علی آرائیں نے شرکت کی۔ علماء کرام نے تقریب میں شریک ہو کر جوڑوں کا نکاح پڑھایا۔اس تقریب کا بنیادی مقصد مستحق خاندانوں کی معاونت کرنا اور نوبیاہتا جوڑوں کی ازدواجی زندگی کا باوقار آغاز فراہم کر کے سماجی بہبود کو فروغ دینا تھا۔اصغریہ پاکستان ویلفیئر پروجیکٹ کی جانب سے ایس ای ایف فاؤنڈیشن، ایف ای ایم ٹی، تمام رضاکاروں اور معاونین کا شکریہ ادا کیا گیا جنہوں نے اس تقریب کو کامیاب بنانے میں اپنا فعال کردار ادا کیا۔