عمرکوٹ (رپورٹ: بیوروچیف ڈاکٹر ایم لال واگھانی)
حلقہ پی ایس کنری کے رکنِ صوبائی اسمبلی نوابزادہ تیمور خان ٹالپر کی جانب سے ڈپٹی کمشنر آفس عمرکوٹ کے دربار ہال میں ایک کھلی کچہری منعقد کی گئی، جس میں ضلع بھر سے بڑی تعداد میں شہریوں نے شرکت کرکے اپنے مختلف مسائل اور شکایات پیش کیں۔
کھلی کچہری کے موقع پر ڈپٹی کمشنر عمرکوٹ نوید الرحمان لاڑک، ایس ایس پی عمرکوٹ سہائی عزیز ٹالپر، چیئرمین ضلع کونسل عمرکوٹ حاجی محمد بقا پلی، چیئرمین میونسپل کمیٹی عمرکوٹ سیف اللہ خالد سراج سومرو، چیئرمین ٹاؤن کمیٹی کنری شکیل احمد باجواہ، پی پی پی نائب صدر ضلع عمرکوٹ برھان الدین کنبھر سمیت مختلف سرکاری محکموں کے افسران بھی موجود تھے۔
اس موقع پر شہریوں نے صحت، تعلیم، پینے کے صاف پانی، بجلی، آبپاشی، سڑکوں کی تعمیر و مرمت، نکاسیٔ آب، بلدیاتی سہولیات، ریونیو، پولیس اور زراعت سے وابستہ اپنے مسائل اور شکایات پیش کیں۔
رکنِ صوبائی اسمبلی نوابزادہ تیمور خان ٹالپر نے شہریوں کی شکایات کو تفصیل سے سنا اور ضلعی افسران کو ہدایات جاری کیں کہ عوامی نوعیت کے مسائل کو ترجیحی بنیادوں پر حل کیا جائے اور افسران عوام کی شکایات کو سنجیدگی سے لیتے ہوئے فوری اقدامات کریں۔