ٹھٹھہ (رپورٹ بیوروچیف):
سندھ ترقی پسند پارٹی (ایس ٹی پی) کے چیئرمین ڈاکٹر قادر مگسی نے "سندھ میری ماں” عوامی رابطہ مہم کے سلسلے میں ضلع ٹھٹھہ کے مختلف شہروں کا دورہ کیا۔ اس موقع پر گھارو میں منعقدہ بڑے جلسے سے خطاب کرتے ہوئے ڈاکٹر قادر مگسی نے کہا کہ حکمران اقتدار کے نشے میں حقائق سے آنکھیں بند کر لیتے ہیں، جس کے نتیجے میں ملک کو سنگین مشکلات کا سامنا کرنا پڑتا ہے۔
انہوں نے ماضی اور حال کے حالات کا موازنہ کرتے ہوئے کہا کہ 1970ء کی غلط پالیسیوں کے نتیجے میں ملک دو حصوں میں تقسیم ہوا، جبکہ موجودہ غلط پالیسیوں کے باعث بلوچستان میں امن و امان کی صورتحال انتہائی خراب ہو چکی ہے۔ خیبر پختونخوا اور کشمیر میں بھی حالات تشویشناک ہیں، اور اب پرامن جمہوری راستہ اختیار کرنے والے سندھ کو نشانہ بنایا جا رہا ہے۔
ڈاکٹر قادر مگسی نے واضح کیا کہ سندھ کے عوام کبھی پاکستان کے خلاف نہیں رہے اور نہ ہی ملک توڑنے کی کسی سازش کا حصہ بنے ہیں۔ پاکستان کے شہری ہونے کی حیثیت سے ہم اپنے آئینی اور جمہوری حقوق کا مطالبہ کرتے ہیں۔ سندھ کے عوام اپنی مادرِ وطن کی خودمختاری، جغرافیائی حدود اور وحدت کے تحفظ کے لیے جدوجہد کر رہے ہیں، اور سندھ کی جغرافیائی و وحدانی حدود کے ساتھ کسی بھی قسم کی چھیڑ چھاڑ ہرگز برداشت نہیں کی جائے گی۔
ایس ٹی پی کے چیئرمین نے مطالبہ کیا کہ پاکستان میں نئے صوبے بنانے کے نام پر تجربات کا سلسلہ فوری بند ہونا چاہیے۔ سندھ کی تقسیم کا منصوبہ پاکستان کے وفاق کو مزید کمزور کرنے کا باعث بنے گا، جبکہ ان کی جماعت پاکستان کی بقا اور سلامتی کی بات کرتی ہے۔
انہوں نے سیاسی کشیدگی پر تنقید کرتے ہوئے کہا کہ ایک دوسرے پر الزامات عائد کیے جا رہے ہیں اور بعض رہنماؤں کو ایجنٹ قرار دینے جیسے بیانات سامنے آ رہے ہیں۔ ایسے معاملات کو سیاسی تماشہ بنا کر انتشار اور خانہ جنگی جیسی صورتحال پیدا کرنے کی کوشش نہیں ہونی چاہیے۔ انہوں نے کہا کہ کراچی کے شہریوں نے نسل پرستی، لسانی تقسیم اور سندھ کی تقسیم کی سیاست کو مکمل طور پر مسترد کر دیا ہے۔
ڈاکٹر قادر مگسی کا کہنا تھا کہ سندھ اسمبلی اس حوالے سے تقسیم کے خلاف قرارداد بھی منظور کر چکی ہے، مگر اس کے باوجود وفاقی سطح پر نئے صوبے بنانے کی باتیں کی جا رہی ہیں۔ انہوں نے اعلان کیا کہ اگر سندھ کی وحدت اور جغرافیائی سالمیت کو نقصان پہنچانے کی کوشش کی گئی تو سندھ کے عوام جمہوری اور پرامن سیاسی جدوجہد کے ذریعے اس کی بھرپور مخالفت کریں گے۔
واضح رہے کہ سندھ ترقی پسند پارٹی کی "سندھ میری ماں” مہم کے تحت سندھ کے مختلف شہروں میں عوامی رابطہ پروگرام منعقد کیے جا رہے ہیں، جن کا مقصد سندھ کی وحدت، جغرافیائی سالمیت اور سیاسی حقوق کا تحفظ ہے۔