سیالکوٹ (سلیم احمد اعوان سے)
گوجرانوالہ میں سسرالیوں کی جانب سے دوبارہ بیٹی کی پیدائش کی خبر ملنے پر حاملہ بہو پر بدترین تشدد کا افسوسناک واقعہ سامنے آیا ہے۔
تفصیلات کے مطابق تھانہ صدر کے علاقے جی میگنولیا کے رہائشی امجد جاوید نے پولیس کو درخواست دیتے ہوئے بتایا کہ ان کی بیٹی عروج امجد کی شادی تقریباً ڈیڑھ سال قبل واپڈا ٹاؤن کے معروف کاروباری شخص مہر عبدالمنان کے بیٹے طیب منان سے ہوئی تھی۔ شادی کے بعد ان کے ہاں پہلی بیٹی کی پیدائش ہوئی۔
امجد جاوید کے مطابق ان کی بیٹی اس وقت 5 ماہ کی حاملہ ہے اور گزشتہ روز الٹراساؤنڈ کے دوران معلوم ہوا کہ دوبارہ بیٹی پیدا ہونے والی ہے۔ اس بات پر شوہر طیب منان طیش میں آ گیا اور اپنے گھر والوں کے ساتھ مل کر عروج امجد کو شدید تشدد کا نشانہ بنایا۔
درخواست میں الزام عائد کیا گیا ہے کہ ملزمان نے خاتون کا حمل ضائع کرنے کی کوشش کی اور اس کا سر دیواروں سے ٹکرایا، جس کے باعث وہ شدید زخمی ہو گئی۔
واقعے کی اطلاع ملتے ہی تھانہ صدر پولیس نے مقدمہ درج کر کے نامزد ملزم طیب منان اور دیگر اہل خانہ کی گرفتاری کے لیے مختلف مقامات پر چھاپے مارنے شروع کر دیے ہیں۔