سامارو کے آسمان پر غیر معمولی فلکیاتی منظر، شہابی پتھر یا خلائی ملبہ؟

عمرکوٹ (رپورٹ: بیورو چیف، ڈاکٹر ایم لال واگھانی)

سامارو میں گزشتہ روز آسمان پر ایک غیر معمولی اور تیز چمکتی ہوئی سفید روشنی دیکھی گئی، جس نے شہریوں میں شدید تجسس اور حیرت پھیلا دی۔

عینی شاہدین کے مطابق یہ پراسرار روشنی شمالی سمت سے حرکت کرتی ہوئی چاند کی جانب بڑھتی نظر آئی۔ علاقے میں دھند اور گرد و غبار کے باعث منظر کچھ دیر تک دھندلا رہا، جبکہ اس بنیادی روشنی کے نیچے تین ستاروں جیسی چمکتی ہوئی اشیاء بھی ایک ساتھ حرکت کرتی دکھائی دیں۔ بعد ازاں، چاند کے قریب پہنچتے ہی یہ روشنی اچانک نظروں سے اوجھل ہو گئی۔

ابتدائی طور پر کچھ افراد کا ماننا ہے کہ یہ واقعہ شہابی پتھر گرنے یا خلائی ملبے کے زمین کی فضائی حدود میں داخلے کا نتیجہ ہو سکتا ہے، تاہم اس حوالے سے فی الحال کوئی حتمی یا باضابطہ تصدیق سامنے نہیں آئی ہے۔ شہریوں نے واقعے کی حقیقی وجہ معلوم کرنے کے لیے متعلقہ ماہرین اور فلکیاتی اداروں سے وضاحت کا مطالبہ کیا ہے۔