امریکی گھروں میں ’روبوٹ ماسی‘ کی انٹری، فی گھنٹہ 30 ڈالر (8 ہزار روپے) فیس مقرر

امریکی ریاست کیلیفورنیا میں روبوٹکس کی ایک جدید کمپنی نے گھروں اور دفاتر کی صفائی ستھرائی کے لیے انسان نما (Humanoid) ’روبوٹ ماسی‘ کی خدمات متعارف کرا دی ہیں، جس کا کرایہ 30 ڈالر (تقریباً 8 ہزار پاکستانی روپے) فی گھنٹہ رکھا گیا ہے۔ ٹیکنالوجی کے اس جدید دور میں صفائی کے شعبے میں سامنے آنے والی اس پیش رفت کے تحت یہ روبوٹ گھریلو کام کاج، جھاڑو پوچھا اور برتن دھونے سمیت صفائی کے مختلف امور انجام دیتے ہیں۔ کمپنی کا کہنا ہے کہ ان روبوٹس کی کارکردگی اور کام کے معیار کو یقینی بنانے کے لیے پسِ پردہ انسانی آپریٹرز لائیو نگرانی بھی کرتے ہیں۔  امریکہ میں عام طور پر صفائی کرنے والے انسانی عملے کی فی گھنٹہ فیس 50 ڈالر یا اس سے زائد ہوتی ہے، جبکہ یہ روبوٹ ماسی صرف 30 ڈالر فی گھنٹہ میں دستیاب ہے۔کمپنی کے مطابق اس سہولت سے خاص طور پر ایسے بوڑھے اور معذور افراد کو بڑا فائدہ پہنچے گا جو اپنے روزمرہ کے گھریلو کام خود انجام دینے میں دشواری محسوس کرتے ہیں۔ اہرین کے مطابق مصنوعی ذہانت اور روبوٹکس کا یہ استعمال ٹیکنالوجی کے ان مثبت پہلوؤں میں سے ایک ہے جو عام انسانوں کی زندگی کو آسان اور آرام دہ بنانے میں مددگار ثابت ہو رہا ہے۔