عمرکوٹ رپورٹ بیوروچیف ڈاکٹر ایم لال واگھانی
سامارو شہر میں آن لائن جوئے کے بڑھتے ہوئے رجحان پر شہریوں نے تشویش کا اظہار کرتے ہوئے انتظامیہ سے فوری توجہ دینے کی اپیل کی ہے۔ شہریوں کا کہنا ہے کہ آن لائن جوئے کے باعث نوجوان اور محنت کش افراد اپنی دن بھر کی کمائی گنوا رہے ہیں، جس سے معاشی مشکلات میں اضافہ ہو رہا ہے۔
تفصیلات کے مطابق
ذرائع کے مطابق بعض افراد دن بھر محنت کرکے ایک ہزار سے پندرہ سو روپے تک کماتے ہیں، تاہم آن لائن جوئے میں اپنی کمائی سے بھی زیادہ رقم ہار جاتے ہیں۔ شہریوں کا کہنا ہے کہ اس صورتحال کے باعث کئی افراد مالی پریشانی اور ذہنی دباؤ کا شکار ہو رہے ہیں۔
شہریوں نے انتظامیہ سے مطالبہ کیا ہے کہ آن لائن جوئے کی سرگرمیوں کا نوٹس لیتے ہوئے قانون کے مطابق کارروائی کی جائے اور نوجوانوں کو اس نقصان دہ رجحان سے بچانے کے لیے آگاہی مہم چلائی جائے۔
والدین سے بھی اپیل کی گئی ہے کہ وہ بچوں کے موبائل فون کے استعمال پر نظر رکھیں اور انہیں غیرضروری اور نقصان دہ آن لائن سرگرمیوں سے دور رکھیں۔
شہریوں کا کہنا ہے کہ محنت کی کمائی کو جوئے میں ضائع کرنے کے بجائے خاندان اور مستقبل کی بہتری کے لیے استعمال کیا جائے۔