وزیر اعلیٰ خیبر پختونخوا سہیل آفریدی نے لانگ مارچ کی حتمی تاریخ کا اعلان کردیا

پشاور:وزیر اعلیٰ خیبر پختونخوا سہیل آفریدی نے کہا ہے کہ پاکستان تحریک انصاف کا لانگ مارچ 4 اکتوبر کو پشاورسے روانہ ہوگا۔
وزیر اعلیٰ ہاؤس پشاور میں پریس کانفرنس کرتے ہوئے وزیر اعلیٰ خیبر پختونخوا سہیل آفریدی نے کہا کہ سیاسی کمیٹی کے اجلاس میں متفقہ طور پر لانگ مارچ کی تاریخ چار اکتوبر مقرر کرنے کا فیصلہ کیا گیا ہے۔
انھوں نے کہا کہ پی ٹی آئی ایک سیاسی جماعت ہے اور پُر امن سیاسی جدوجہد پر یقین رکھتی ہے۔
سہیل آفریدی کا کہنا تھا: ’یہ لوگ چاہتے ہیں کہ ہمیں اشتعال دلایا جائے، لیکن ہم ان کے اشتعال میں نہیں آئیں گے۔انھوں نے کہا کہ اگر عدالتیں انصاف کے تقاضوں کے مطابق فیصلے کریں تو عمران خان ’آدھے گھنٹے میں رہا ہو سکتے ہیں۔وزیر اعلیٰ نے الزام عائد کیا کہ پارٹی کارکنوں کو گرفتار کیا جا رہا ہے اور سیاسی سرگرمیوں میں رکاوٹیں ڈالی جا رہی ہیں۔
قبل ازیں وزیراعلیٰ خیبرپختونخوا نے کہا تھا کہ ’ہمارا لانگ مارچ ہر صورت ہو گا، ہمارا مارچ پر امن ہے، چاہے یہ سڑکوں پر کیلیں ٹھوکیں، کنٹینرز رکھیں یا گولی چلائیں۔‘
پشاور میں پریس کانفرنس کرتے ہوئے انھوں نے کہا کہ ’پی ٹی آئی کی سیاسی کمیٹی کی میٹنگ ابھی بھی جاری ہے جس کے بعد آپ سے دوبارہ ملاقات ہو گی۔ ہم اس بار نکلیں گے تو اس ’کرپٹ نظام ‘کا ہر صورت بندوبست کریں گے۔‘
انھوں نے کہا کہ ’ایک مہینے سے بیانیہ بنایا جا رہا تھا کہ ہمیں انڈیا سے نہیں تین صوبوں سے خطرہ ہے۔ کیا ہم یہ سمجھیں کہ پاکستان کو توڑنے کی سازش پر باقاعدہ کام شروع ہو گیا ہے؟ جہاں خیبرپختونخوا کی سرحد ختم ہوتی ہے وہاں کیلیں ٹھونکی جا رہی ہیں، دوسرے صوبوں کے سرکاری لوگ ہمارے صوبے میں گھس کر گتھم گتھا ہو رہے ہیں۔ اس کو کیا سمجھا جائے۔‘
ان کا کہنا تھا کہ ’ہمیں یہ پیغام ملا ہے کہ ٹی وی پر ہماری پریس کانفرنس نہیں چلائی جائے گی اور صوبے کے وزیر اعلیٰ کو کوریج دینے سے روک دیا گیا ہے۔ جو یہ سازش چل رہی ہے وہ بہت خطرناک ہے۔‘
ان کا کہنا تھا کہ ’ہمارے وزرا کو سادہ کپڑوں میں ملبوس افراد کی مدد سے اغوا کیا جا رہا ہے۔ یہ افرا تفری پھلانے کی کوشش کر رہے ہیں۔ وہ سیکریٹریٹ جس سے پورے صوبے کا نظام چل رہا ہے انھوں نے تھریٹس دے کر کام بند کروا دیے۔ وہاں کوئی تھریٹ نھیں تھا۔