لاہور:وزیر اعلیٰ پنجاب کے ویژن کے مطابق عوام کی خدمت اور فلاحی اقدامات کے سلسلے میں پنجاب سیف سٹیز اتھارٹی نے ایک اور شاندار کارنامہ سر انجام دیا ہے۔
سیف سٹی کی معروف ’میری پہچان‘ ٹیم نے اپنی پیشہ ورانہ صلاحیتوں کا لوہا منواتے ہوئے ایک ہی روز میں نادرا کے جدید بائیومیٹرک سسٹم کی مدد سے 26 ذہنی و جسمانی کمزور افراد اور 5 نامعلوم لاوارث نعشوں کی شناخت کامیابی سے مکمل کر لی ہے۔
From identity to reunion, every clue can bring a family closer together.
The PSCA Mera Pyara team visited orphanages, welfare organizations, and relevant centers in Sialkot and Gujranwala to review unidentified cases, conduct interviews, and gather information to help trace… pic.twitter.com/IIW75CV5Tf
— Punjab Safe Cities Authority (@PSCAsafecities) September 24, 2026
ترجمان سیف سٹیز کے مطابق ’میری پہچان‘ ٹیم نے پنجاب انسٹیٹیوٹ آف مینٹل ہیلتھ لاہور کا خصوصی دورہ کیا جہاں وہاں مقیم 51 ذہنی اور جسمانی طور پر کمزور افراد کی بائیومیٹرک تصدیق کی گئی۔ نادرا کے منسلک جدید نظام کی بدولت ان میں سے 26 افراد کا مکمل شناختی ریکارڈ فوری طور پر حاصل کر لیا گیا، جس سے ان کے خاندانوں تک رسائی کا راستہ صاف ہو گیا ہے۔ اس کے علاوہ ٹیم نے اسی روز کارروائی کرتے ہوئے 5 نامعلوم لاوارث نعشوں کی بھی بائیومیٹرک شناخت مکمل کی۔
پنجاب سیف سٹیز اتھارٹی کی یہ ٹیم صوبہ بھر کے اسپتالوں، مردہ خانوں (ڈید ہاؤسز) اور اولڈ ایج ہومز کے باقاعدگی سے دورے کر رہی ہے۔ اب تک کے اعداد و شمار کے مطابق ’میری پہچان‘ ٹیم 5 ہزار سے زائد لاوارث نعشوں کی بائیومیٹرک شناخت کامیابی سے مکمل کر چکی ہے۔
اس فلاحی پراجیکٹ کے تحت 4 ہزار سے زائد ذہنی و جسمانی کمزور افراد کو ان کے بچھڑے ہوئے خاندانوں سے دوبارہ ملوایا جا چکا ہے۔
ترجمان کا کہنا ہے کہ ایمرجنسی ہیلپ لائن 15 پر موصول ہونے والی اطلاعات کو بھی اس عمل میں بھرپور طریقے سے بروئے کار لایا جا رہا ہے تاکہ معاشرے کے پسے ہوئے اور لاوارث افراد کو ان کی شناخت اور اپنوں کا پیار واپس دلایا جا سکے۔ سیف سٹیز اتھارٹی کا یہ انسانیت دوست اقدام عوام میں زبردست پذیرائی حاصل کر رہا ہے۔