لاہور:باغات کے شہر لاہور کو ایک بار پھر حسن و خوبصورتی کا گہوارہ بنانے کے لیے پارکس اینڈ ہارٹیکلچر اتھارٹی (PHA) نے اب تک کی تاریخ کی سب سے بڑی سرمائی پھولوں کی شاندار مہم کا آغاز کر دیا ہے۔ پی ایچ اے کے ڈائریکٹر جنرل احمد عثمان جاوید نے میڈیا سے گفتگو کرتے ہوئے بتایا کہ شہر کے تمام پارکوں اور گرین بیلٹس کو رنگ برنگے پھولوں سے سجانے کے لیے بڑے پیمانے پر کام شروع کر دیا گیا ہے۔
ڈی جی پی ایچ اے کے مطابق رواں سال شہر کے پارکوں اور گرین بیلٹس میں 13 ہزار 853 فلاور بیڈز تیار کیے گئے ہیں، جبکہ گزشتہ سال یہ تعداد 9 ہزار 505 تھی، جو شہر کی خوبصورتی کے لیے ادارے کی بڑھتی ہوئی کوششوں کا منہ بولتا ثبوت ہے۔
احمد عثمان جاوید نے بتایا کہ رواں سیزن کے دوران ہارٹیکلچر اور پراجیکٹ ڈائریکٹرز کو 47 لاکھ 42 ہزار پھولوں کے بیج فراہم کیے گئے ہیں، جن میں گزشتہ سال کے مقابلے میں 31.38 فیصد ریکارڈ اضافہ کیا گیا ہے۔ نرسریوں میں معیاری پنیری تیار کرنے کے بعد اب اسے باقاعدگی سے ان فلاور بیڈز پر منتقل کرنے کا عمل بھی شروع کر دیا گیا ہے۔
پی ایچ اے کا مشن لاہور کے تمام پارکس اور سڑکوں کے کنارے بنی گرین بیلٹس کو موسم سرما میں انتہائی دلکش اور نظارہ پیش کرنے کے قابل بنانا ہے۔ اس مقصد کے لیے شہر کے 8 زونز اور 11 پراجیکٹ ڈائریکٹرز کو ٹاسک دے کر مقررہ مدت میں تمام کام مکمل کرنے کی سخت ہدایات جاری کر دی گئی ہیں تاکہ لاہور کے باسیوں اور سیاحوں کو سردیوں کے موسم میں ایک بہترین اور پُرفضا ماحول فراہم کیا جا سکے۔