فول پروف سیکیورٹی: آئی جی پنجاب کا صوبہ بھر میں ہائی الرٹ جاری، حساس مقامات اور سفارت خانوں کی نگرانی سخت

لاہور:آئی جی پنجاب نے جمعۃ المبارک کے بابکت موقع پر لاہور سمیت صوبہ بھر میں امن و امان کی صورتحال کو برقرار رکھنے اور کسی بھی ممکنہ ناخوشگوار واقعے سے نمٹنے کے لیے سکیورٹی کے انتہائی سخت انتظامات کرنے کے احکامات جاری کر دیے ہیں۔ پولیس افسران کو واضح ہدایات دی گئی ہیں کہ وہ فیلڈ میں موجود رہیں اور سکیورٹی اقدامات کی خود مانیٹرنگ کریں۔
موجودہ سکیورٹی صورتحال اور ممکنہ خطرات کے پیش نظر آئی جی پنجاب نے مساجد، امام بارگاہوں، مزارات، اہم مارکیٹوں اور چینی سمیت تمام غیر ملکی سفارت خانوں اور ان کے عملے کی سکیورٹی کو انتہائی فول پروف بنانے کی ہدایت کی ہے۔ اس کے علاوہ ملک دشمن عناصر، جن میں فتنہ الخوارج اور فتنہ الہندوستان جیسے عناصر شامل ہیں، ان پر کڑی نظر رکھنے اور غیر قانونی طور پر مقیم غیر ملکی باشندوں کے انخلا کی جاری مہم کو مزید تیز کرنے کا حکم دیا گیا ہے۔
شہروں کے تمام داخلی اور خارجی راستوں پر مشکوک افراد, مشتبہ گاڑیوں اور سامان کی مکمل تلاشی کو یقینی بنایا جا رہا ہے۔ مساجد، امام بارگاہوں اور کاروباری مراکز کے اطراف جبکہ اہم شاہراہوں پر پولیس کی گشت (پٹرولنگ) میں نمایاں اضافہ کر دیا گیا ہے۔ آئی جی پنجاب نے ہدایت کی ہے کہ دفعہ 144 کی پابندی پر ہر صورت سختی سے عمل درآمد کیا جائے اور قانون ہاتھ میں لینے والے کسی بھی شخص کو ہرگز معاف نہ کیا جائے۔ اہم مقامات کی مسلسل نگرانی کے لیے سی سی ٹی وی کیمروں کا استعمال کیا جا رہا ہے تاکہ کسی بھی مشتبہ سرگرمی پر فوری اور بروقت کارروائی عمل میں لائی جا سکے۔