سیالکوٹ (رپورٹ: سلیم احمد اعوان شیخو)
ڈسٹرکٹ اینڈ سیشن جج سیالکوٹ ارشد جاوید نے شہری پر بہیمانہ تشدد کرنے کے الزام میں 5 عدالتی بیلف کو ملازمت سے معطل کر کے ان کے خلاف انکوائری شروع کر دی ہے۔ معطل ہونے والے بیلف میں اظہر عباس، محمد بوٹا، شاہد محمود، عدنان علی اور حسن شہزاد شامل ہیں۔
تفصیلات کے مطابق محلہ نور پورہ خادم علی روڈ کے رہائشی شہری عمر ولد امجد کے خلاف اس کی سابقہ بیوی نے فیملی جج راحیلہ خالد کی عدالت میں مقدمہ دائر کر رکھا تھا، جس کا فیصلہ شہری کے خلاف آیا تھا۔ بیلف اس سے قبل بھی عمر کو گرفتار کرنے کی کوشش کرتے رہے تھے لیکن وہ انہیں چکمہ دے کر غائب ہو جاتا تھا۔
بدھ کے روز جب عمر سول کورٹ میں کسی دوسرے مقدمے کی پیشی کے لیے آیا تو اس کی سابقہ بیوی نے عدالتی بیلف کو اس کی نشاندہی کر دی۔ بیلف نے اسے گرفتار کرنے کی کوشش کی جس پر عمر نے مزاحمت کی۔ اس موقع پر مذکورہ بیلف نے شہری پر شدید اور بہیمانہ تشدد کیا جس سے وہ نیم مردہ ہو گیا۔ بیلف نے اسے زخمی حالت میں گرفتار کر کے فیملی جج کی عدالت میں پیش کیا، جہاں سے اسے ڈسٹرکٹ جیل سیالکوٹ بھجوا دیا گیا۔
ڈسٹرکٹ اینڈ سیشن جج نے واقعے کا نوٹس لیتے ہوئے اختیارات سے تجاوز اور شہری پر تشدد کرنے پر تمام 5 بیلف کو معطل کر کے تحقیقات کا حکم دے دیا ہے۔