تیسری بغاوت کی پلاننگ ،والدین بچوں کو بانی پی ٹی آئی کے ناپاک سیاسی عزائم اور بغاوتوں سے دور رکھیں، عظمیٰ بخاری

لاہور / ملتان:وزیر اطلاعات پنجاب عظمیٰ بخاری نے کہا ہے کہ لاہور کے بعد اب جنوبی پنجاب کے مرکز ملتان میں بھی کینسر کے مریضوں کا بالکل مفت علاج کیا جائے گا۔ وزیر اعلیٰ پنجاب مریم نواز شریف نے ملتان میں کینسر ٹریٹمنٹ کے لیے کوابلیشن (Coblating) مشین اور کینسر سینٹر کا باضابطہ افتتاح کر دیا ہے، جو صوبے کی تاریخ میں صحت کے شعبے کا ایک بہت بڑا سنگِ میل ہے۔
لاہور میں پریس کانفرنس سے خطاب کرتے ہوئے عظمیٰ بخاری کا کہنا تھا کہ اس نئے سینٹر میں ہر سٹیج کے کینسر کے مریضوں کا مفت علاج ہو گا، اور اب مریضوں کو مہنگے علاج کے لیے طویل تاریخیں نہیں دی جائیں گی بلکہ جدید ترین کوابلیشن ٹیکنالوجی کے ذریعے مریض کا علاج صرف 60 منٹ میں مکمل ہو جائے گا۔ انہوں نے مزید بتایا کہ لاہور میں پاکستان کا سب سے بڑا ایک ہزار بستروں پر مشتمل نواز شریف کینسر ہسپتال بھی مکمل ہو چکا ہے، جو پی کے ایل آئی (PKLI) کی طرح دنیا بھر میں پاکستان کی ایک شاندار پہچان بنے گا۔
وزیر اطلاعات نے اپوزیشن کو آڑے ہاتھوں لیتے ہوئے کہا کہ مریم نواز کا کسی دوسری صوبائی حکومت سے کوئی مقابلہ یا موازنہ ہی نہیں ہے۔ جو لوگ کارکردگی کے میدان میں وزیراعلیٰ پنجاب کا مقابلہ نہیں کر سکتے، وہ صرف ذاتی حملے کر کے عوام کو گمراہ کرنے کی ناکام کوشش کر رہے ہیں۔
عظمیٰ بخاری نے خیبرپختونخوا کے وزیراعلیٰ اور پی ٹی آئی قیادت کو تنقید کا نشانہ بناتے ہوئے کہا کہ ایک صوبے کا وزیراعلیٰ در بدر کی ٹھوکریں کھانے کے بعد وفاق پر چڑھائی کی تیاری کر رہا ہے۔ 9 مئی اور 26 نومبر کی ناکام بغاوتیں پہلے ہی بانی پی ٹی آئی کے گلے کا طوق بن چکی ہیں، اور اب 27 ستمبر کو تیسری بغاوت کی پلاننگ کی جا رہی ہے۔ انہوں نے کے پی کے والدین سے اپیل کی کہ وہ اپنے بچوں کو بانی پی ٹی آئی کے ناپاک سیاسی عزائم اور بغاوتوں سے دور رکھیں، کیونکہ بانی کے اپنے بچے لندن میں پرتعیش زندگی گزار رہے ہیں جبکہ وہ غریب پختونخوا کے بچوں کو سیاست کی بھینٹ چڑھانا چاہ رہے ہیں۔