جنگ کسی مسئلے کا حل نہیں، حتمی راستہ سفارت کاری اور مکالمہ ہے: سپیکر پنجاب اسمبلی ملک محمد احمد خاں

گجرات:سپیکر پنجاب اسمبلی ملک محمد احمد خاں نے گجرات چیمبر آف کامرس اینڈ انڈسٹری کے نومنتخب عہدیداران کی تقریبِ حلف برداری سے بطورِ مہمانِ خصوصی خطاب کرتے ہوئے کہا ہے کہ پاکستان کو موجودہ چیلنجز سے نبردآزما ہونے کے لیے اپنی دفاعی صلاحیت پر بھرپور توجہ دینے کے ساتھ ساتھ معاشی استحکام، مہنگائی میں کمی اور سماجی نظم کے اہداف کو بھی یکساں اہمیت دینا ہوگی۔
گجرات کے صنعت کاروں اور کاروباری شخصیات سے خطاب کرتے ہوئے سپیکر پنجاب اسمبلی کا کہنا تھا کہ مشکل ترین معاشی حالات کے باوجود بھی کاروباری برادری کی جانب سے مسلسل سرمایہ کاری جاری رکھنا ملک کی معیشت کے لیے ایک روشن امید کی علامت ہے۔ انہوں نے اس عزم کا اعادہ کیا کہ ملک کی ترقی کی سمت کو بار بار تبدیل ہونے سے بچا کر اسے پائیدار اور مسلسل ترقی کی شاہراہ پر گامزن کرنا وقت کی اہم ترین ضرورت ہے۔
ملک محمد احمد خاں نے پاک بھارت کشیدگی کے تناظر میں بات کرتے ہوئے کہا کہ حالیہ چیلنجز کے دوران پاکستان نے انتہائی مؤثر دفاعی صلاحیت کا شاندار مظاہرہ کیا، جس کی بدولت پوری دنیا نے پاکستان کی عسکری اور تکنیکی استعداد کا اعتراف کیا۔ اس صلاحیت نے ملک کے دفاع اور قومی اعتماد کو ناقابلِ تسخیر تقویت بخشی ہے۔
سپیکر نے واضح کیا کہ ریاستوں کے درمیان تنازعات کا حتمی اور درست راستہ جنگ ہرگز نہیں بلکہ سفارت کاری، مکالمہ اور امن ہے۔ جنگ کی صورت میں سب سے زیادہ نقصان معیشت، بنیادی ڈھانچے اور عام شہریوں کو اٹھانا پڑتا ہے، اس لیے خطے میں پائیدار امن کے قیام کے لیے ذمہ دارانہ رویہ اور سنجیدہ سفارتی کوششیں ناگزیر ہیں۔
انہوں نے زور دیا کہ قومی سلامتی کے تقاضوں کے ساتھ ساتھ معاشی استحکام، مہنگائی میں کمی، سماجی نظم کی بہتری اور ترقی کی رفتار کو تیز کرنا حکومت اور ریاست کی اولین ترجیح ہونی چاہیے۔ تقریب کے آخر میں انہوں نے نومنتخب عہدیداران کو مبارکباد پیش کی اور امید ظاہر کی کہ وہ گجرات کی صنعتی ترقی میں اپنا بھرپور کردار ادا کرتے رہیں گے۔