سیالکوٹ (سلیم احمد اعوان – نمائندہ خصوصی): پولیس کو رشوت دے کر جھوٹا مقدمہ درج کروانے کی کوشش کرنے والا جعلی سی سی ڈی (CCD) انسپکٹر خاتون سمیت گرفتار کر لیا گیا۔
تفصیلات کے مطابق گوجرانوالہ کے تھانہ لدھے والا وڑائچ کی پولیس نے ملزم میاں عامر کو اس وقت گرفتار کیا جب اس نے تھانے کے محرر نعیم کو 50 ہزار روپے کی رشوت دیتے ہوئے ایک درخواست پر مقدمہ درج کرنے کا کہا۔ ملزم نے خود کو سی سی ڈی انسپکٹر ظاہر کیا اور موقف اپنایا کہ اس کے ساتھ آئی خاتون ‘انیقہ’ (سکنہ سیالکوٹ) کے ساتھ زیادتی ہوئی ہے، لہٰذا اس کا باضابطہ مقدمہ درج کیا جائےے۔
پولیس نے شک گزرنے پر جب معاملے کی چھان بین کی تو حقیقت سامنے آ گئی کہ خاتون انیقہ کے بھائی کاشف نے سیالکوٹ میں کسی کے ساتھ زیادتی کی تھی، اور اس مقدمے کے اثر کو زائل (کاؤنٹر) کرنے کے لیے یہاں گوجرانوالہ میں جھوٹا مقدمہ درج کروایا جا رہا تھا۔ مزید تحقیقات پر معلوم ہوا کہ میاں عامر کا سی سی ڈی یا پولیس کے شعبے سے کوئی تعلق نہیں ہے اور وہ ایک جعلی انسپکٹر ہے۔
پولیس نے کارروائی کرتے ہوئے جعلی انسپکٹر میاں عامر اور خاتون انیقہ کو موقع پر ہی گرفتار کر کے ان کے خلاف قانونی مقدمہ درج کر لیا ہے۔
