سیالکوٹ (سلیم احمد اعوان )
ڈسکہ میں تعینات نائب تحصیلدار کو سول عدالت کے فیصلے کی خلاف ورزی کرنے پر نوکری سے معطل کر دیا گیا۔
تفصیلات کے مطابق کمشنر گوجرانوالہ ڈویژن محمد علی نے ڈسکہ میں تعینات نائب تحصیلدار محمود جاوید باگڑی کے خلاف سخت اقدام اٹھاتے ہوئے انہیں معطل کرنے کے احکامات جاری کیے۔ معلوم ہوا ہے کہ مذکورہ نائب تحصیلدار نے سول عدالت کے واضح فیصلے کی خلاف ورزی کرتے ہوئے دو رجسٹریوں کا اندراج کیا تھا۔
واقعے کا نوٹس لیتے ہوئے ڈپٹی کمشنر سیالکوٹ اویس مشتاق نے نائب تحصیلدار کو عدالتی حکم کی خلاف ورزی پر سرنڈر کر کے رپورٹ کمشنر گوجرانوالہ ڈویژن کو ارسال کی، جس میں ان کے خلاف پیڈا ایکٹ (PEEDA Act) 2006ء کے تحت قانونی کارروائی کی سفارش کی گئی تھی۔
کمشنر گوجرانوالہ نے ڈپٹی کمشنر کی رپورٹ کی روشنی میں نائب تحصیلدار محمود جاوید باگڑی کو فوری معطل کرتے ہوئے واقعے کی باضابطہ انکوائری مقرر کر دی ہے۔