ورجینیا :امریکی ریاست ویسٹ ورجینیا میں پولیس نے ایک خاتون کو اپنے شوہر کو مسلسل 19 گھنٹے تک بغير کھانے اور پانی کے حمام یعنی ٹوائلٹ میں چھوڑنے کے جرم میں گرفتار کر لیا۔ اس طرح چھوڑنے کی بنا پر اس کے شوہر کی موت ہو گئی تھی۔
پولیس نے اس خاتون پر مجرمانہ دفعات کے تحت مقدمہ درج کر کے اسے عدالت میں پیش کر دیا ہے جہاں اسے اس واقعے کی وجہ سے کئی سال کی قید کی سزا ہو سکتی ہے۔
عالمی ذرائع ابلاغ کی رپورٹس کے مطابق ڈیمینشیا میں مبتلا 76 سالہ شوہر کو گزشتہ 21 اگست کو ہسپتال منتقل کیا گیا تھا تاہم اس واقعے کے دس دن بعد وہ انتقال کر گئے۔ خاتون کے خلاف دائر کردہ مجرمانہ شکایت کے مطابق ایک سپیچ تھراپسٹ نے اس شخص کو ٹوائلٹ پر موجود انتہائی خراب طبی حالت میں اور بے ہوشی کی حالت میں غیر فعال پایا۔
یہ شخص 31 اگست کو سیپسس (خون میں زہر پھیلنے) اور ہارٹ فیلیر کے باعث فوت ہو گیا۔ پوسٹ مارٹم رپورٹ میں یہ نتیجہ اخذ کیا گیا کہ ٹوائلٹ پر پھنسے رہنے کے دوران پہنچنے والے زخم اس کی موت کی اہم وجہ تھے۔ ان کی 75 سالہ بیوی مارگریٹ لوئیز روگ نے مونوگیلیا کاؤنٹی کے شیرف کے دفتر کو بتایا کہ ان کے شوہر 20 اگست کی سہ پہر تقریباً 3 بجے مورگن ٹاؤن شہر کے اورچرڈ کراسنگ علاقے میں واقع اپنے گھر کے ٹوائلٹ میں گئے تھے۔
پولیس نے شکایت میں بتایا کہ روگ نے اگلے 19 گھنٹوں تک اپنے شوہر کی مکمل نظر انداز کیے رکھا۔ ان کے شوہر میں پہلے سے الزائمر، ڈیمینشیا، اندھا پن اور دیگر متعدد طبی مسائل کی تشخیص ہو چکی تھی۔
حکام نے روگ پر ایمرجنسی سروس "911” پر کال نہ کرنے یا کسی سے مدد نہ مانگنے کا الزام لگایا۔ نیز یہ بھی الزام ہے کہ روگ اپنے شوہر کو ٹوائلٹ کے اندر بغیر کسی دیکھ بھال کے بے ہوشی یا غیر فعال حالت میں چھوڑ کر سونے چلی گئیں۔
مارگریٹ لوئیز روگ کو 15 ستمبر کو گرفتار کر کے نارتھ سینٹرل ریجنل جیل منتقل کر دیا گیا۔ عدالتی ریکارڈ کے مطابق روگ پر ایک معذور بالغ شخص کے ساتھ ایسی بدسلوکی یا لاپرواہی – یا شدید غفلت – کا الزام عائد کیا گیا ہے جس کی وجہ سے شدید جسمانی چوٹ یا موت کا سنگین خطرہ پیدا ہوجاتا ہے۔
روگ نے اپنے اوپر لگے الزامات میں صحت سے انکار کیا ہے۔ عدالت نے ضمانت کی رقم 75 ہزار ڈالر مقرر کی ہے جبکہ ان کے کیس کی ابتدائی سماعت 25 ستمبر کو ہونا طے پائی ہے۔
19 گھنٹوں تک ٹوائلٹ میں پھنسے بیمار معمر شوہر کو نہ نکالنے پر بیوی گرفتار
