لاہور:سی سی پی او لاہور بلال صدیق کمیانہ نے کرپشن میں ملوث پولیس ملازمین کے خلاف سخت ترین محکمانہ کارروائی عمل میں لانے کا دوٹوک حکم دے دیا ہے۔
یہ ہدایت انہوں نے کیپٹل سٹی پولیس ہیڈ کوارٹرز میں منعقدہ ایک اہم اجلاس کی صدارت کرتے ہوئے دی، جس میں سول لائنز اور سٹی ڈویژنز کی کارکردگی کا تفصیلی جائزہ لیا گیا۔ اجلاس کے دوران سی سی پی او نے واضح کیا کہ محکمہ اندرونی بدعنوانی پر کسی قسم کی نرمی نہیں برتے گا اور شکایات پر زیرو ٹالرنس پالیسی اپنائی جائے گی۔
اجلاس میں آئندہ ماہ انگلینڈ، سری لنکا اور پاکستان کے مابین کھیلی جانے والی سہ ملکی کرکٹ سیریز کے سکیورٹی پلان کا خصوصی جائزہ لیا گیا۔ سی سی پی او لاہور نے احکامات جاری کیے کہ غیر ملکی کرکٹ ٹیموں کے لاہور میں قیام، ہوٹل سے اسٹیڈیم آمدورفت اور میچز کے دوران انتہائی سخت اور فول پروف سکیورٹی یقینی بنائی جائے۔
شہر میں اسٹریٹ کرائمز اور چوری کی وارداتوں پر قابو پانے کے لیے اجلاس میں اہم فیصلے کیے گئے جس کے مطابق چوری اور موبائل چھیننے (سنیچنگ) کے تمام ہاٹ سپاٹس پر سکیورٹی کے خصوصی اور سخت انتظامات کیے جائیں گے۔
جیب تراشی اور نقب زنی میں ملوث عناصر کے خلاف بلاامتیاز کریک ڈاؤن کا حکم دیا گیا جبکہ چوری اور نقب زنی کی وارداتوں کو روکنے کے لیے متاثرہ علاقوں میں بیریئرز کی تنصیب، نجی سکیورٹی گارڈز کی تعیناتی اور پولیس پٹرولنگ میں نمایاں اضافہ کرنیکا فیصلہ کیا گیا
اسی طرح فیصلہ ہوا کہ مجرموں کی تلاش اور نگرانی کے لیے پنجاب سیف سٹیز اتھارٹی کے کیمرہ نیٹ ورک سے بھرپور مدد لی جائے۔
اجلاس میں ڈی آئی جی (ایڈمن) عمران کشور، ڈی آئی جی (آپریشنز) فیصل کامران، ایس ایس پی (انوسٹی گیشن) محمد نوید، ایس ایس پی (آپریشنز) عبداللہ احمد سمیت سول لائنز اور سٹی ڈویژنز کے ایس پیز، اے ایس پیز، سرکل افسران، تمام ایس ایچ اوز اور انچارجز انوسٹی گیشن نے شرکت کی۔ سی سی پی او نے تمام یونٹس کو ہدایت کی کہ باہمی کوآرڈینیشن کو مزید بہتر بناتے ہوئے شہریوں کے جان و مال کا تحفظ یقینی بنایا جائے۔
کرپشن پر زیرو ٹالرنس: سہ ملکی کرکٹ سیریز کے لیے فول پروف سکیورٹی،لاہور پولیس کے اعلیٰ سطحی اجلاس میں اہم فیصلے
