کیلے فورنیا:ویڈیو شیئرنگ کی دنیا کے سب سے بڑے پلیٹ فارم یوٹیوب نے اسمارٹ ٹی وی صارفین کی پرائیویسی کو مزید محفوظ بنانے کے لیے ایک نیا اور شاندار فیچر ’اکاؤنٹ لاک‘ (Account Lock) عالمی سطح پر متعارف کرا دیا ہے، جسے اب امریکہ سمیت دنیا بھر کے صارفین کے لیے پیش کر دیا گیا ہے۔
عموماً گھروں میں ایک ہی اسمارٹ ٹی وی پورا خاندان استعمال کرتا ہے، جس کی وجہ سے ہر فرد کی یوٹیوب سرچ ہسٹری، ویڈیوز کی پسند اور ذاتی نوعیت کی تجاویز (Recommendations) سب کے سامنے آ جاتی ہیں اور بعض اوقات پرائیویسی متاثر ہونے کا خطرہ رہتا ہے۔ اس مسئلے کا حل نکالتے ہوئے یوٹیوب نے نیا فیچر متعارف کرایا ہے جس کے تحت صارفین چار ہندسوں (4-Digit Code) کا پن کوڈ سیٹ کر کے اپنے اکاؤنٹ کو باآسانی لاک کر سکتے ہیں۔ اکاؤنٹ لاک ہونے کے بعد کسی دوسرے فرد کو متعلقہ صارف کی سبسکرپشنز، سرچ ہسٹری اور ویڈیوز کی ترجیحات دیکھنے کا موقع نہیں ملے گا، جو خاص طور پر بچوں اور متعدد افراد والے گھرانوں کے لیے انتہائی کارآمد ثابت ہوگا۔
اکاؤنٹ کو سیٹ اپ کرنے کا طریقہ:
صارفین اس فیچر کو درج ذیل آسان مراحل کے ذریعے فعال کر سکتے ہیں:
اپنے اسمارٹ ٹی وی پر یوٹیوب ایپ اوپن کریں۔
دائیں یا بائیں جانب موجود مینو میں جا کر اپنا اکاؤنٹ منتخب کریں۔
اکاؤنٹ کے بالکل نیچے دیے گئے ’سیٹنگز‘ کے آپشن پر کلک کریں۔
اسکرین پر آنے والی ہدایات پر عمل کرتے ہوئے چار ہندسوں کا خفیہ کوڈ (Pin) درج کر کے فیچر کو فعال کریں۔
ایک بار کوڈ سیٹ ہونے کے بعد اکاؤنٹ لاک ہو جائے گا اور اسے کھولنے کے لیے موبائل ایپ کے ذریعے نوٹیفکیشن کی تصدیق یا مطلوبہ کوڈ درج کرنا ہوگا۔ اس کے علاوہ صارفین google.com/devices پر جا کر یہ بھی چیک کر سکتے ہیں کہ ان کا اکاؤنٹ اس وقت کس کس ڈیوائس پر لاگ ان ہے، اور کسی بھی نامعلوم یا غیر ضروری ڈیوائس کو گھر بیٹھے ریموٹلی سائن آؤٹ بھی کیا جا سکتا ہے۔