سیالکوٹ (بیورو رپورٹ: سلیم احمد اعوان شیخو)
پاکستان کے معروف اور متنازعہ ٹک ٹاکر انصر، جو کہ "مسٹر پتلو” کے نام سے سوشل میڈیا پر جانے جاتے ہیں، کی سابقہ اہلیہ نے ان پر شدید الزامات عائد کرتے ہوئے تہلکہ خیز انکشافات کیے ہیں۔ سابقہ اہلیہ کے مطابق ان کا رشتہ چار سال تک قائم رہا، تاہم شہرت اور دولت ملنے کے بعد شوہر نے مبینہ طور پر دھوکہ دیا اور شدید ذہنی اذیت دی۔متاثرہ خاتون نے دعویٰ کیا ہے کہ ان کی شادی 10 نومبر 2021ء کو انصر (مسٹر پتلو) کے ساتھ ہوئی تھی اور یہ رشتہ چار سال تک چلا۔ ان کا کہنا ہے کہ مسٹر پتلو نے انہیں مکمل طور پر لاعلم رکھ کر طلاق دے دی اور طلاق کا باقاعدہ نوٹس یا اطلاع تک نہیں دی۔سابقہ اہلیہ کا کہنا ہے کہ انہوں نے اس وقت مسٹر پتلو کا ساتھ دیا جب وہ مالی مشکلات کا شکار تھے اور ان کے پاس کچھ نہیں تھا۔ لیکن جوں ہی انہیں شہرت اور دولت ملی، ان کا رویہ یکسر تبدیل ہو گیا اور ان کے مبینہ طور پر کئی خواتین کے ساتھ ناجائز تعلقات قائم ہو گئے۔خاتون نے الزام عائد کیا کہ جب انہوں نے سوشل میڈیا پر اپنی شادی کا اقرار کرنے کا کہا تو مسٹر پتلو نے انہیں شدید دھمکیاں دیں کہ وہ ان کی نجی لمحات کی ویڈیوز لیک کر کے ان کے گھر والوں کو بھیج دیں گے۔ اس مسلسل ذہنی دباؤ اور ہراسانی کی وجہ سے وہ شدید ڈپریشن کا شکار ہو گئیں اور اب ان کا انحصار نیند کی ادویات پر ہے۔سابقہ اہلیہ کا کہنا ہے کہ وہ اب خاموش نہیں رہ سکتیں اور ان کا میڈیا یا سوشل میڈیا پر سامنے آنے کا بنیادی مقصد یہ ہے کہ دوسری معصوم لڑکیاں اس طرح کے فریب اور استحصال سے محفوظ رہ سکیں۔