لاہور:نئے آئی فون 18 اور فولڈ ایبل آئی فونز کی متوقع لانچ سے چند روز قبل ایپل نے پرانے ماڈلز کی قیمتوں میں بڑی گراوٹ کا اعلان کر دیا ہے، جس کے بعد دنیا بھر کے شائقینِ ٹیکنالوجی کے لیے سستے داموں آئی فون 17 حاصل کرنے کا یہ بہترین اور آخری موقع بن گیا ہے۔
معروف جریدے فوربز کی رپورٹ کے مطابق، نئے اسٹاک کی راہ ہموار کرنے کے لیے عالمی مارکیٹس اور ریٹیلرز نے آئی فون 17 سیریز پر بھاری ڈسکاؤنٹس کی برسات کر دی ہے۔ برطانیہ میں ایمیزون نے آئی فون 17 پرو اور پرو میکس کی قیمتوں میں 150 پاؤنڈز تک کی بڑی کمی کر دی ہے، جبکہ آئی فون ایئر (512 جی بی ماڈل) پر پورے 200 پاؤنڈز کی بچت دی جا رہی ہے۔ اسی طرح یورپی ممالک اسپین اور جرمنی میں بھی میڈیا مارکٹ اور دیگر بڑے اسٹورز پر آئی فون 17 پرو میکس 150 یورو تک سستا مل رہا ہے۔
تاہم، ماہرین کا کہنا ہے کہ یہ ڈسکاؤنٹس عارضی ہیں کیونکہ 9 ستمبر کو آئی فون 18 کی رونمائی کے بعد ایپل کی جانب سے آئی فون 17 پرو اور پرو میکس کے ماڈلز کو مستقل طور پر بند کیے جانے کا قوی امکان ہے۔ دوسری جانب، میموری چپس کے عالمی بحران کے باعث آنے والے نئے آئی فون 18 پرو کی قیمتوں میں 100 سے 200 ڈالر تک اضافے کی بازگشت بھی سنائی دے رہی ہے، جس کے بعد سمارٹ فون خریداروں کے لیے یہی وقت سب سے بہترین منافع بخش سودا ثابت ہو سکتا ہے۔
آئی فون 17 کی قیمتوں میں تاریخی کمی، سستے داموں خریدنے کا سنہری موقع
